Geely yangi yo‘ltanlamas modelini Shvetsiyada sinovdan o‘tkazmoqda. Bu haqda «Tarantas Nyus» nashri xabar bermoqda. Kompaniya e’lon qilgan suratlarda Geely Galaxy Cruiser konsepti asosida yaratilayotgan seriyali avtomobil ko‘rinish bergan.
Yangi model tashqi ko‘rinishi bilan Land Rover Defender yo‘ltanlamasiga o‘xshash dizaynga ega. Avtomobil dastlab 2026-yilda Xitoy bozorida sotuvga chiqishi rejalashtirilgan. Keyinchalik model Yevropa bozoriga ham olib chiqilishi mumkin.
Hozirda prototiplar Shvetsiyada qishki sinovlardan o‘tmoqda. Kompaniya sovuq iqlim sharoitida iqlim tizimlari, quvvat agregati samaradorligi hamda yo‘l bilan tishlashish darajasini tekshirayotganini ma’lum qildi.
Tashqi ko‘rinishda konsept dizayni deyarli saqlab qolingan. Avtomobil qisqa osmalar, kengaytirilgan g‘ildirak arkalariga ega. Orqa qismi esa tashqariga ochiladigan eshik va zaxira g‘ildirak bilan jihozlangan.
Dastlabki ma’lumotlarga ko‘ra, yangi yo‘ltanlamas SEA-R platform platformasida quriladi. Avtomobil gibrid quvvat tizimi bilan taqdim etilishi kutilmoqda.
Kuch qurilmasi 2,0 litrli turbobenzin dvigatel va uchta elektromotordan iborat bo‘lishi mumkin. Batareya sig‘imi taxminan 70 kVt/soat bo‘lib, u elektr rejimida 354 km gacha masofa bosib o‘tishga imkon berishi aytilmoqda.
Shuningdek, model uchun 1,5 litrli gibrid dvigatelga ega boshqa versiya ham ko‘rib chiqilmoqda. Bu tizim kompaniyaning Geely Galaxy M9 modelida qo‘llanilgan.
Avtomobil sun’iy intellekt asosidagi to‘liq uzatma tizimi bilan jihozlanishi mumkin. Konsept versiyada hatto suvda ikki soatgacha suzish va 8,5 km/soat tezlikda harakatlanish imkoniyati haqida ham aytilgan. Biroq bu funksiya seriyali modelda saqlanib qolishi hozircha noma’lum.
Yangi yo‘ltanlamas Geely uchun strategik ahamiyatga ega loyiha hisoblanadi. Chunki Xitoy bozorida Land Rover pozitsiyalari zaiflashib, mahalliy ishlab chiqarish hajmi kamaymoqda. Shu fon’da Geely premium off-road segmentiga o‘z modelini olib kirishni maqsad qilmoqda.
Eslatib o‘tamiz, Kursiv Uzbekistan nashri Geely Galaxy Starshine 6 avtomobili yangilangani haqida yozgan edi.
