AQShda mart oyida 2026-yilgi Chevrolet Silverado 1500 pikapi uchun bir nechta chegirma, lizing va kredit takliflari e’lon qilindi. Bu haqda GMAutority xabar bermoqda. Chevrolet ayrim konfiguratsiyalar uchun avtomobil narxidan $7 minggacha chegirma bermoqda.
Xarid uchun chegirmalar
Chevrolet ayrim versiyalar uchun to‘g‘ridan to‘g‘ri pul chegirmalarini taklif qilmoqda. Masalan, 2,7 litrli TurboMax dvigatelli Silverado 1500 uchun $1,35 ming paket chegirmasi, $3 ming mijoz bonusi va $1 ming qo‘shimcha bonus beriladi. Ayrim bozorlarda umumiy chegirma $5,3 minggacha yetishi mumkin.
5,3 litrli V8 dvigatelli Silverado 1500 RST versiyasida esa chegirma yanada katta. Bu model uchun $3,7 ming pul chegirmasi va $3,6 ming yetkazib beruvchi chegirmasi taklif qilinadi. Ayrim konfiguratsiyalarda umumiy chegirma $7,3 minggacha chiqadi.
Boshqa konfiguratsiyalar uchun esa $2,5 ming mijoz bonusi va $750 qo‘shimcha bonus mavjud. Bu holatda umumiy chegirma $3,2 minggacha bo‘lishi mumkin.
Kredit va lizing takliflari
Chevrolet 2026 Silverado uchun past foizli kredit ham taklif qilmoqda. Avtomobilni 36 oyga 1,9 foiz stavka bilan moliyalashtirish mumkin. Kredit GM Financial orqali rasmiylashtiriladi. Ayrim bozorlarda qo‘shimcha $750 bonus ham beriladi.
Lizing takliflari ham mavjud. Masalan, Silverado 1500 LT 4WD TurboMax versiyasi uchun 36 oyga oyiga $379 to‘lov bilan lizing olish mumkin. Shartnoma imzolash vaqtida $1,8 ming atrofida boshlang‘ich to‘lov talab qilinadi.
Ba’zi maxsus dasturlarda oylik to‘lov $329 yoki hatto $189 gacha tushishi mumkin. Bu takliflar asosan GM xodimlari yoki Chevrolet avtomobilining amaldagi lizing mijozlari uchun mo‘ljallangan.
Mazkur aksiyalar 31-mart 2026-yilgacha amal qiladi.
Silverado narxlari
2026-yilgi Silverado 1500 modelining boshlang‘ich narxi $39,7 ming atrofida. Eng qimmat versiya esa $83 mingdan oshadi. Narxlar model konfiguratsiyasi va opsiyalarga qarab farq qiladi.
Pikap quyidagi asosiy versiyalarda sotiladi: Work Truck, Custom, LT, RST, LTZ, High Country va off-road uchun mo‘ljallangan ZR2.
Model haqida
2026-yilgi Silverado katta o‘zgarishlarsiz taqdim etildi. Bu model amaldagi to‘rtinchi avlodning so‘nggi yili hisoblanadi. 2027-yilda esa butunlay yangi avlod Silverado chiqishi kutilmoqda.
Yangi avlod modelida yangilangan dizayn, modern interyer va yangi V8 dvigatellar paydo bo‘lishi mumkin. Ba’zi ma’lumotlarga ko‘ra, pikap gibrid versiya bilan ham taqdim etilishi ehtimoli bor.
Eslatib o‘tamiz, Kursiv Uzbekistan nashri Chevrolet Cobalt qaysi davlatlarda sotilishi haqida yozgan edi.
