PlayStation 2 taqdimoti, kichik Bekhem va Davide Astorining vafoti — kun tarixi

4-mart sanasi texnologiya olamidagi inqilobiy yangiliklar, shuningdek, jahon futboli tarixidagi quvonchli va qayg‘uli voqealar bilan yodda qolgan. Kursiv Uzbekistan kunning eng muhim voqealarini xronologik tartibda taqdim etadi.

1951-yili Shotlandiya futboli va Angliyaning «Liverpul» klubi tirik afsonasi Kenni Dalglish tavallud topdi. U o‘z faoliyati davomida ko‘plab sovrinlarni, jumladan, uch marta Yevropa chempionlari kubogini qo‘lga kiritgan. Muxlislar orasida «Qirol Kenni» nomini olgan hujumchi Yevropa futboli tarixida o‘chmas iz qoldirgan.

1969-yilda eronlik afsonaviy futbolchi Ali Dayi dunyoga keldi. U uzoq yillar davomida xalqaro maydonda o‘z terma jamoasi safida 109 ta gol urib, mutlaq rekordchi bo‘lgan va bu natija keyinchalik Krishtianu Ronaldu tomonidan yangilangan. «Bavariya» kabi nufuzli klublarda to‘p surgan hujumchi Osiyo futbolining eng yorqin yulduzlaridan biri sanaladi.

1999-yili afsonaviy futbolchi Devid Bekxem va xonanda Viktoriya Bekxemning to‘ng‘ich o‘g‘li Bruklin Bekxem tug‘ilgan. U yoshligidanoq sport va media olamida, qolaversa, internet makonida yoshlarga yaxshi tanilgan shaxsga aylandi. Hozirgi kunda u o‘zini fotografiya va pazandachilik yo‘nalishlarida sinab ko‘rmoqda hamda ijtimoiy tarmoqlarda millionlab kuzatuvchilarga ega.

2000-yilning 4-martida Yaponiyaning Sony kompaniyasi PlayStation 2 o‘yin konsolini ilk bor sotuvga chiqardi. Ushbu qurilma DVD disklarni o‘qish xususiyatiga ega bo‘lgani uchun tezda ommalashib, butun dunyo bo‘ylab 155 mlndan ortiq nusxada sotilgan. Natijada u barcha davrlarning eng ko‘p sotilgan konsoli sifatida tarixga kirdi.

2018-yili Italiya terma jamoasi va «Fiorentina» klubi sardori Davide Astori 31 yoshida to‘satdan vafot etdi. Uning mehmonxonada yurak xurujidan olamdan o‘tishi butun futbol olamini chuqur qayg‘uga solgan edi. Futbolchining xotirasiga hurmat bajo keltirish maqsadida «Fiorentina» va «Kalyari» klublari u to‘p surgan 13-raqamni abadiy muomaladan chiqardi.

Avvalroq Kursiv Uzbekistan 3-mart sanasida sodir bo‘lgan muhim hodisalar haqida xabar bergan edi.