2026-yil avtomobil bozori uchun muhim davr bo‘lishi kutilmoqda. Ishlab chiqaruvchilar endi faqat elektromobillarga tayanmayapti. Ko‘plab kompaniyalar gibrid, plug-in gibrid va zamonaviy ichki yonuv dvigatelli modellarga ham e’tibor qaratmoqda. Motor1 portali 2026-yilda taqdim etiladigan eng yaxshi yangi avtomobillar ro‘yxatini tuzdi.
Audi RS6
Audi RS6 Avant modelining yangilangan versiyasi 2026-yilda taqdim etilishi kutilmoqda. Yangi avtomobil plug-in gibrid tizim bilan jihozlanishi mumkin.
Model V8 dvigatelga ega bo‘lishi taxmin qilinmoqda. Uning umumiy quvvati 700 ot kuchidan oshishi mumkin. Tashqi dizaynda ham sezilarli o‘zgarishlar bo‘ladi. Old qism qayta ishlanadi va orqa tomonda yangi egzoz tizimi paydo bo‘ladi.
Bentley yangi elektr SUV ustida ishlamoqda
Britaniyaning Bentley kompaniyasi Bentayga modelidan kichikroq elektr krossover ishlab chiqmoqda. Hozircha model «Urban SUV» nomi bilan tanilgan.
Avtomobil to‘liq elektr bo‘ladi. Model 2026-yilda namoyish etilishi va 2027-yilda sotuvga chiqishi kutilmoqda. Narxi taxminan $150 ming atrofida bo‘lishi mumkin.
BMW 3 Series yangi davrga kiradi
BMW 3 Series modelining yangi avlodi ham 2026-yilda taqdim etiladi. Avtomobil benzin dvigatelli va elektr versiyalarda ishlab chiqariladi.
Model dizayni Neue Klasse konsepti asosida yaratiladi. Retro elementlar va zamonaviy texnologiyalar birlashtiriladi. Elektr versiyasi yangi batareya tizimi bilan jihozlanadi.
BMW iX4 va iX5 yangi elektr krossoverlari
BMW yana bir nechta elektr SUV modellarini ham tayyorlamoqda. Ulardan biri iX4 bo‘lib, kupe uslubidagi elektr krossover sifatida taqdim etiladi.
Model taxminan 470 ot kuchiga ega bo‘lishi mumkin. U 108 kVt/soat batareya bilan jihozlanadi.
Shuningdek, kompaniya yirik iX5 modelini ham taqdim etadi. Bu avtomobil elektr, benzin va plug-in gibrid versiyalarda ishlab chiqarilishi rejalashtirilgan. Kelajakda vodorod yoqilg‘ili variant ham paydo bo‘lishi mumkin.
Dodge Charger Hellcat yana V8 bilan qaytadi
Dodge Charger Hellcat modeli yana V8 dvigatel bilan ishlab chiqarilishi mumkin. Kompaniya muxlislari aynan kuchli dvigatelni kutmoqda.
Hellcat versiyasi 5,7 yoki 6,4 litrli dvigatellar o‘rniga yanada kuchli motor bilan jihozlanishi mumkin. Bu model yuqori narxga ega bo‘lsa ham, sport avtomobil muxlislari orasida talab yuqori bo‘lishi kutilmoqda.
Ferrari tarixidagi birinchi elektromobil
Ferrari kompaniyasi ham o‘zining ilk elektromobilini taqdim etadi. Model Ferrari Luce nomi bilan chiqishi kutilmoqda.
Avtomobil 2026-yil 25-may kuni namoyish qilinadi. Model juda yuqori quvvatga ega bo‘lishi va narxi taxminan $535 ming bo‘lishi kutilmoqda.
Genesis GV90
Genesis kompaniyasi GV90 modelini taqdim etishga tayyorlanmoqda. Bu to‘liq elektr va katta o‘lchamli SUV bo‘ladi.
Model uch qatorli salon bilan jihozlanadi. Avtomobil yuqori darajadagi komfort va keng salon bilan ajralib turadi. U Lucid Gravity kabi premium elektr krossoverlar bilan raqobat qiladi.
Jaguar yangi elektr sedan bilan qaytadi
Jaguar kompaniyasi yangi davrni boshlash uchun Type 00 nomli elektr sedan tayyorlamoqda.
Bu avtomobil kompaniyaning butun model qatorini yangilash strategiyasining bir qismi hisoblanadi. Model yuqori quvvatli elektr grand-turer sifatida bozorga chiqadi.
Mercedes‑AMG kompaniyasi ham GT XX nomli yangi elektr model ustida ishlamoqda. Bu to‘rt eshikli super sedan uchta elektr motor bilan jihozlanadi. Umumiy quvvati 1341 ot kuchiga yetishi mumkin. Maksimal tezligi esa soatiga 375 km ga yaqin bo‘lishi kutilmoqda.
Volkswagen ID. Tiguan elektr SUV
Volkswagen ID. Tiguan modeli ham 2026-yilda paydo bo‘ladi. U ID.4 modelining yangilangan versiyasi hisoblanadi. Model yangi MEB+ platformasida ishlab chiqariladi. Bu esa avtomobilning samaradorligi va quvvatini oshiradi.
Eslatib o‘tamiz, Kursiv Uzbekistan nashri Chevrolet Tracker avtomobili uchun chegirmalar e’lon qilingani haqida yozgan edi.
