Xitoyning MG kompaniyasi yangi MG 07 elektromobilining ilk tizer tasvirini e’lon qildi. Bu haqda CarNewsChina nashri xabar bermoqda.
Yangi avtomobil avvalgi MG7 modelining dizayn uslubini saqlab qoladi. Biroq u to‘liq elektr arxitekturasiga ega bo‘ladi. Mutaxassislar bu modelni Xiaomi SU7 va BYD Seal uchun raqobatchi deb baholamoqda. MG 07 tom qismida LiDAR sensori bilan jihozlanadi. Bu esa shahar sharoitida Level 2+ darajadagi yarim avtonom haydash tizimini qo‘llab-quvvatlaydi.
Salonida MG va OPPO hamkorligida yaratilgan aqlli ulanish tizimi bo‘lishi kutilmoqda. Bu tizim OPPO smartfonlari bilan chuqur integratsiyani ta’minlaydi. Avtomobil SAIC’ning Nebula platformasida ishlab chiqiladi. Ushbu platforma 800 voltli elektr arxitekturasini qo‘llab-quvvatlaydi.
MG 07 yangi Rubik’s Cube batareya tizimi bilan jihozlanishi mumkin. Batareya elementlari gorizontal joylashadi. Shu sababli batareya bloki juda yupqa bo‘ladi va salon ichida ko‘proq joy paydo bo‘ladi.
Platforma LFP va NCM turidagi batareyalarni qo‘llab-quvvatlaydi. Shuningdek, SAIC va QingTao Energy ishlab chiqayotgan yarim qattiq elektrolitli batareyalar ham qo‘llanishi mumkin. Ularning energiya zichligi 400 Wh/kg gacha yetadi. MG 07 uzunligi taxminan 4,9 metr bo‘ladi. G‘ildirak bazasi esa 2,85 metr atrofida bo‘lishi kutilmoqda. Bu ko‘rsatkich MG7 modelidan kattaroq. Dizaynda ramkasiz eshiklar va uch bosqichli faol orqa spoyler qo‘llanadi.
Kompaniya modelni elektr va plug-in gibrid versiyalarda taklif qilishi mumkin. PHEV varianti taxminan 165,8 ming yuan ($22,9 ming) dan boshlanishi kutilmoqda. LiDAR bilan jihozlangan elektr flagman versiyasi esa 230 ming yuan ($33,3 ming) gacha yetishi mumkin.
Eslatib o‘tamiz, Kursiv Uzbekistan MG yangi gibrid avtomobilini sinovdan o‘tkazayotgani haqida yozgan edi.
