Nubia brendi yangi Red Magic Cooler 8 Pro sovitish tizimini taqdim etdi. Qurilma orqa qopqoqqa biriktiriladigan kichik blokli ventilyator sifatida ishlatiladi.
Yangi qurilma 1640 mm² maydonga ega termoelektrik sovitish plastinasi bilan jihozlangan bo‘lib, ishlab chiqaruvchi ma’lumotlariga ko‘ra, bu avvalgi avlod sovitqichga nisbatan samaradorlikni 130% ga oshiradi. Shuningdek, u 36 Vtgacha quvvatni chiqarish imkoniga ega.
Qurilma ichidagi ventilyator 6500 aylanma/minut tezlikda ishlaydi, bu esa sezilarli shovqin bilan birga keladi. Red Magic Cooler 8 Pro magnitlar yordamida smartfon korpusiga biriktiriladi, shuning uchun uni faqat ba’zi smartfonlar, jumladan, iPhone bilan ishlatish mumkin.
Nubia Red Magic Cooler 8 Pro’ning o‘lchamlari 70 x 63 x 31 mm, og‘irligi 113 grammni tashkil qiladi. Xitoy bozorida Red Magic Cooler 8 Pro narxi $40 etib belgilangan.
Eslatib o‘tamiz, avvalroq Nubia Red Magic 11 Air o‘yin smartfonini namoyish etgan edi.
