Volkswagen kompaniyasi Xitoy uchun yangi Volkswagen ID. Unyx 08 elektromobilini taqdim etdi. Bu haqda Motor1 portali xabar bermoqda.
Model faqat Xitoy bozorida sotiladi. Avtomobilni boshqa mamlakatlarda chiqarish rejalashtirilmagan. Yangi elektromobil salonida katta ekranlar asosiy rolni o‘ynaydi. Markaziy konsolda deyarli tugmalar yo‘q. Ularning o‘rnini 14,96 dyuymli ikkita sensor ekran egallagan. Ushbu displeylar 2.4K aniqlikda ishlaydi.
Shuningdek, haydovchi uchun 10,25 dyuymli alohida raqamli panel ham mavjud. Rul va eshiklarda esa oddiy boshqaruv tugmalari saqlab qolingan.
Avtomobilning yana bir muhim jihati — katta panoramali tom. Uning maydoni 1,74 kv metrni tashkil qiladi. Shisha qorayishini ovozli buyruq yoki sensor ekran orqali 10 xil darajada sozlash mumkin.
Salon ichida ikki dona simsiz zaryadlash maydoni mavjud. Orqa o‘rindiqlarda esa old o‘rindiqlardan tushiriladigan katta stolchalar bor. Avtomobil 20 karnayli audio tizim bilan jihozlangan. Charm o‘rindiqlar esa 10 yo‘nalishda elektr sozlanadi.
Model Volkswagen Anhui qo‘shma korxonasi tomonidan ishlab chiqilgan. Avtomobil yaratishda Xitoyning Xpeng kompaniyasi ham ishtirok etgan.
ID. Unyx 08 to‘liq elektr krossover hisoblanadi. Uning uzunligi 5 000 mmga yetadi. G‘ildirak bazasi esa 3 030 mmni tashkil etadi.
Orqa o‘rindiqlar yig‘ilganda yukxona hajmi 1 845 litrgacha kengayadi. Avtomobil bir va ikki motorli versiyalarda taqdim etiladi. Batareya uchun ikki variant taklif qilinadi: 82 kVt/soat va 95 kVt/soat. Eng katta yurish masofasi 730 kmgacha yetadi. Bu ko‘rsatkich CLTC sikliga asoslangan. Yangi elektromobil yaqin haftalarda Xitoy bozorida sotuvga chiqishi kutilmoqda.
Eslatib o‘tamiz, Kursiv Uzbekistan nashri Volkswagen Golf 9 avtomobili qanday imkoniyatlar bilan chiqishi haqida yozgan edi.
