Eron Jahon chempionatida ishtirok etmasligi mumkin — sport vaziri

Eron 2026-yilgi FIFA World Cup 2026’da ishtirok eta olmasligi mumkin. Bu haqda mamlakat sport vaziri Ahmad Donyamali davlat televideniyesiga bergan bayonotida ma’lum qildi, deya yozmoqda Reuters nashri.

Uning so‘zlariga ko‘ra, yaqinda AQSh va Isroil tomonidan amalga oshirilgan havo hujumlari natijasida Eronning oliy rahbari Ali Xomanaiy halok bo‘lganidan keyin mamlakatda vaziyat keskinlashgan. Shu sababli Eron jamoasi turnirda qatnashmasligi mumkin.

«Bu rejim bizning yetakchimizni o‘ldirgan sharoitda biz hech qanday holatda Jahon chempionatida ishtirok eta olmaymiz», — dedi vazir.

2026-yilgi FIFA World Cup 2026 11-iyundan 19-iyulgacha AQSh, Meksika va Kanadada bo‘lib o‘tadi.

Avvalgi qur’aga ko‘ra, Eron terma jamoasi G guruhida Belgiya, Misr va Yangi Zelandiya bilan o‘ynashi kerak edi. Guruh bosqichidagi uchala uchrashuv ham AQShda — ikki o‘yin Los-Anjelesda, biri esa Sietlda o‘tkazilishi rejalashtirilgan.

Shuningdek, Eron o‘tgan hafta Atlantada o‘tgan Jahon chempionati ishtirokchilari uchun tashkil etilgan FIFA yig‘ilishida qatnashmagan yagona davlat bo‘ldi.

Ayni paytda FIFA mazkur bayonot yuzasidan rasmiy izoh bermagan.

Avvalroq «Kursiv» nashri O‘zbekistonning Jahon chempionatidagi raqibi o‘zgarishi mumkinligi haqida yozgandi.