Apple kompaniyasi eski iPhone va iPad modellarini qo‘llab-quvvatlash maqsadida iOS 16.7.15, iPadOS 16.7.15, iOS 15.8.7 va iPadOS 15.8.7 yangilanishlarini e’lon qildi. Bu haqda Macrumors ma’lum qildi.
Ushbu yangilanishlar yangi iOS va iPadOS versiyalarini qo‘llay olmaydigan qurilmalar uchun mo‘ljallangan. Foydalanuvchilar yangilanishlarni Sozlamalar (Settings) ilovasini ochib, Umumiy (General) bo‘limidan Dasturiy ta’minotni yangilash (Software Update) bandini tanlash orqali o‘rnatishlari mumkin. Agar avtomatik yangilanish yoqilgan bo‘lsa, yangi dasturiy ta’minot yaqin kunlarda avtomatik o‘rnatiladi.
Apple kompaniyasi iPhone’lar uchun xavfsizlik yangilanishlarini qurilma chiqarilganidan so‘ng kamida besh yil davomida taqdim etishni maqsad qilgan. Biroq, ko‘pincha yangilanishlar bundan uzoq muddat davomida chiqariladi. Shu yil boshida iPhone 5s dastlabki chiqarilganidan 13 yil o‘tib yangi dasturiy ta’minot yangilanishini olgan edi.
iOS/iPadOS 15.8.7 va iOS/iPadOS 16.7.15 yangilanishlari Coruna nomli xavfsizlik zaifligini tuzatadi. Ushbu muammo ilgari iOS 16 va iOS 17 yangilanishlarida hal qilingan bo‘lsa-da, bugungi yangilanishlar eski qurilmalar uchun ham mo‘ljallangan bo‘lib, ularni iOS 17 yoki undan keyingi versiyalarga yangilash imkoni bo‘lmasa ham shu tuzatishlarni oladi.
Eslatib o‘tamiz, avvalroq Samsung Galaxy S26 qurilmalarida yangi xavfsizlik funksiyasi joriy etilgan edi.
