Xitoyning XPeng kompaniyasi 2026-yilning 18-mart kuni P7 seriyasidagi yangilangan elektromobillarini rasman taqdim etdi. Bu haqda Carnewschina xabar bermoqda.
Yangilangan qatorga Max va UltraSE komplektatsiyalari, shuningdek, uchta yangi tana rangi qo‘shildi. Narxlar 702 Max versiyasi uchun 203,8 ming yuan ($29,5 ming)dan boshlanib, eng qimmat 750 4WD Wing Ultra modeli 301,8 ming yuanga baholanmoqda. Barcha yangi Max versiyalari kelajakda avtopilot tizimini yangilashni qo‘llab-quvvatlaydi.
Asosiy yangilik ikkinchi avlod VLA nomli ilg‘or haydovchiga yordam tizimi hisoblanadi. XPeng ushbu texnologiyani L4 darajasidagi avtonom haydashga erishishga qaratilgan «jismoniy dunyoning katta modeli» deb ta’riflamoqda. Tizim uchta sun’iy intellekt chipi yordamida 2250 TOPS hisoblash quvvatiga ega bo‘lib, murakkab yo‘l sharoitlarida insondek qaror qabul qilish imkoniyatini taqdim etadi.
Elektromobil 800V yuqori kuchlanishli platformada qurilgan va 5C o‘ta tez quvvatlanishni qo‘llab-quvvatlaydi. Rasmiy ma’lumotlarga ko‘ra, atigi 10 daqiqalik quvvatlanish orqali avtomobil 525 kilometr masofani bosib o‘tish imkonini beradi. 750 4WD modeli 100 km/soat tezlikka 3,7 soniyada erishadi va uning maksimal tezligi 230 km/soatni tashkil etadi.
Ekspertlarning ta’kidlashicha, XPeng dizaynni saqlab qolish maqsadida faqat videokameralarga asoslangan avtonom haydash tizimini tanlagan yagona Xitoy avtoishlab chiqaruvchisi bo‘lib qolmoqda. O‘tgan yilning oxirida P7 savdolari keskin pasayib, noyabr oyida atigi 2,9 ming donani tashkil qilgan bo‘lsa-da, kompaniya ushbu agressiv yangilanish orqali bozordagi mavqeini tiklashga harakat qilmoqda.
Avvalroq Kursiv Uzbekistan XPeng tez quvvatlanadigan yirik SUV modelini ishlab chiqarishni boshlagani haqida xabar bergan edi.
