Xitoyda Aito M6 modelining oldindan savdosi boshlandi. Bu haqda CarNewsChina nashri xabar bermoqda.
Model ikki xil versiyada taklif qilinmoqda. EREV varianti 269,8 ming yuan, ya’ni taxminan $39,1 mingdan boshlanadi. To‘liq elektr versiya esa 289,8 ming yuan yoki $42 mingdan start oladi. Elektromobil versiyasi gibridga qaraganda qariyb $3 ming qimmatroq qiymatga ega.
Yangi Aito M6 dizayni kompaniyaning boshqa modellari — M7, M8 va M9’dan farq qiladi. Old qismida «yulduzsimon» faralar qo‘llanilgan bo‘lib, ular olmosga o‘xshash effekt beradi. Aerodinamikani yaxshilash uchun faralar ostiga havo kanallari joylashtirilgan.
Avtomobil o‘lchamlari 4960 mm uzunlik, 1985 mm kenglik va 1736 mm balandlikni tashkil etadi. G‘ildirak bazasi 2950 mm. Xaridorlar 20 yoki 21 dyuymli disklarni tanlashi mumkin. Salon qismi zamonaviy texnologiyalar bilan boyitilgan. Unda to‘liq raqamli panel, head-up display va aylanuvchi markaziy ekran mavjud. Bundan tashqari, simsiz zaryadlash, panoramali tom va keng saqlash joylari ham taklif etiladi.
Texnik jihatdan model EREV va EV variantlarda taqdim etiladi. EREV versiyada 1,5 litrli dvigatel va ikkita elektromotor mavjud. Ularning umumiy quvvati 300 kVtga yaqinlashadi. Batareya sig‘imi 37 yoki 53 kWh bo‘lib, elektr rejimida 272 kmgacha yuradi.
To‘liq elektr versiya esa orqa yoki to‘liq tortish tizimida taklif etiladi. Eng kuchli konfiguratsiya 340 kVt quvvat beradi. Barcha EV versiyalar 100 kWh batareya bilan jihozlanadi va 760 kmgacha yurish zaxirasini taqdim etadi.
Aito M6 kompaniyaning zamonaviy texnologiyalar va yuqori yurish masofasiga ega krossoverlar segmentidagi yangi raqobatchisi sifatida bozorga chiqmoqda.
Eslatib o‘tamiz, Kursiv Uzbekistan nashri Volvo XC70 avtomobili test-drayv qilingani haqida yozgan edi.
