Xitoyda Lynk & Co 10+ modelining rasmiy suratlari e’lon qilindi. Bu haqda CarNewsChina nashri xabar bermoqda.
Yangi elektromobil yangilangan Z10 asosida yaratilgan bo‘lib, sport ruhidagi dizayn va yuqori quvvat bilan ajralib turadi. Model tashqi ko‘rinishida agressiv uslub qo‘llanilgan. Bundan tashqari, avtomobil yarim yashirin eshik tutqichlari, ramkasiz oynalar, tom qismida LiDAR sensori va 21 dyuymli disklar bilan jihozlangan.
Sedan o‘lchamlari 5050 mm uzunlik, 1966 mm kenglik va 1468 mm balandlikni tashkil etadi. G‘ildirak bazasi esa 3005 mmga teng. Model zamonaviy haydovchiga yordam tizimlari bilan ham ajralib turadi. U G-Pilot H5 tizimi bilan jihozlanib, LiDAR, radarlar, kameralar va Nvidia Drive Orin chipi orqali boshqariladi.
Yangi Lynk & Co 10+ ning eng asosiy ustunligi uning kuchli elektr tizimi hisoblanadi. Avtomobil ikkita elektromotor bilan jihozlangan. Old motor 310 kVt, orqa motor esa 370 kVt quvvat ishlab chiqaradi. Umumiy quvvat 680 kVt yoki 912 ot kuchiga yetadi. Modelning maksimal tezligi 240 km/soatni tashkil etadi. Tezlanish ko‘rsatkichlari hali rasman e’lon qilinmagan, biroq mutaxassislar avtomobil 0 dan 100 km/soatgacha taxminan 2,8 soniyada chiqishi mumkinligini taxmin qilmoqda.
Batareya haqida aniq ma’lumotlar berilmagan. Biroq model Zeekr 001 bilan o‘xshash texnologiyadan foydalanishi mumkin. Bu esa 95 yoki 103 kWh sig‘imli batareyalar va 900V tizimni anglatadi. Kompaniya, shuningdek, Lynk & Co 10 modelining oddiy versiyasini ham taqdim etadi. U sport elementlarsiz bo‘lib, bitta elektromotor bilan 300 kVt quvvat beradi. Kuchliroq versiya esa 370 kVtga ega bo‘ladi.
Ma’lumot uchun, hozirgi Lynk & Co Z10 modeli 200–580 kVt diapazonda quvvatga ega variantlarda taklif etiladi. Uning elektr yurish masofasi 602 km dan 806 kmgacha yetadi. Yangi Lynk & Co 10+ yaqin vaqt ichida Xitoy bozoriga chiqishi kutilmoqda. Model kompaniyaning yuqori samaradorlikka ega elektro sedanlar segmentidagi pozitsiyasini mustahkamlashi mumkin.
Eslatib o‘tamiz, Kursiv Uzbekistan nashri Nissan Leaf avtomobili 5 yilda qancha qiymat yo‘qotishi haqida yozgan edi.
