O‘zbekistonda eng ko‘p tanlanadigan avtomobillar orasida Chevrolet Cobalt va Tracker alohida o‘rin egallaydi. Ular turli segmentga mansub bo‘lsa-da, ko‘pincha xaridorlar aynan shu ikki model o‘rtasida tanlov qiladi. Quyida ularning asosiy farqlari va qaysi holatda qaysi biri yaxshiroq ekanini ko‘rib chiqamiz.
Dizayn va kuzov
Cobalt klassik sedan hisoblanib, uning dizayni oddiy va amaliy qilib ishlangan. Tracker esa krossover bo‘lib, balandroq kuzov va zamonaviy ko‘rinishga ega. Shahar va yomon yo‘llarda Tracker qulayroq, lekin Cobalt ham soddaligi bilan ajralib turadi.
Narx va xarajatlar
Cobaltning asosiy ustunligi uning arzonligidir. Bu model boshlang‘ich segmentga mansub bo‘lib, xarid va xizmat xarajatlari ham past. Tracker esa ancha qimmat. Uning ehtiyot qismlari va texnik xizmat ko‘rsatish ham yuqoriroq bo‘lishi mumkin. Agar budjet muhim bo‘lsa, Cobalt aniq ustunlikka ega.
Har ikkala avtomobilni ham kutmasdan xarid qilish mumkin. Ayrim dilerlik markazlarida Cobalt’ni yuz foizlik to‘lov bilan xarid qilish imkoni bo‘lsa, Chevrolet Tracker UzAuto Motors tomonidan chegirmali va kreditga taklif qilinadi.
Dvigatel va texnik xususiyatlar
Cobalt 1,5 litrli oddiy atmosferali dvigatel bilan jihozlangan. Bu motor ishonchli va gaz bilan ishlashga mos. Tracker esa 1,2 litrli turbomotor bilan taklif etiladi. U kuchliroq va zamonaviy, lekin murakkabroq tuzilishga ega. Tezlik va dinamika bo‘yicha Tracker oldinda, lekin uzoq muddatli arzon ekspluatatsiya uchun Cobalt qulayroq bo‘lishi mumkin.
Komfort va texnologiyalar
Tracker bu borada aniq ustun. U zamonaviy multimedia tizimi, sensorlar, kamera va xavfsizlik funksiyalariga ega. Salon sifati ham yuqori. Cobalt esa minimal qulayliklarga ega bo‘lib, oddiy foydalanuvchilar uchun yetarli darajada jihozlangan.
Yo‘l sharoitida harakat
Tracker balandroq klirensga ega. Bu yomon yo‘llarda va qishloq hududlarida katta ustunlik beradi. Cobalt esa asfalt yo‘llar uchun mo‘ljallangan. Shahar ichida u yetarli darajada qulay, lekin notekis yo‘llarda imkoniyatlari cheklangan.
Cobalt O‘zbekistonda eng ommabop modellardan biri. Uni oson va tez sotish mumkin. Tracker ham talabga ega, ammo bozorda nisbatan kamroq tarqalgan. Shu sababli likvidlik bo‘yicha Cobalt ustun.
Texnik xususiyatlar:
| Ko‘rsatkich | Cobalt | Tracker |
|---|---|---|
| Narxi | 146 455 000 so‘mdan | 215 951 360 so‘mdan |
| Dvigatel | 1.5 L, atmosfera | 1.2 L, turbo |
| Quvvat | 106 ot kuchi | 132 ot kuchi |
| Uzatmalar qutisi | 5MT / 6AT | 6AT |
| Yoqilg‘i sarfi | 7.3 L / 100 km | 6.5 L / 100 km |
| Maksimal tezlik | 170 km/soat | 180 km/soat |
| 0–100 km/soat | 11.7 sek | 11.1 sek |
| Bagaj hajmi | 563 L | 390 / 1311 L |
| Yoqilg‘i baki | 46 L | 44 L |
| Uzunligi | 4479 mm | 4270 mm |
| Kengligi | 1735 mm | 1791 mm |
| Balandligi | 1514 mm | 1624 / 1626 mm |
| G‘ildirak bazasi | 2620 mm | 2570 mm |
| Klirens | 155 mm | 161 mm |
| Og‘irligi | 1172–1243 kg | 1350 kg |
| To‘liq massa | 1590–1620 kg | 1685 kg |
Eslatib o‘tamiz, Kursiv Uzbekistan nashri Chevrolet avtomobillarida eng ko‘p uchraydigan muammolar va ularning yechimini bitta maqolaga jamlagan edi.
