AQSh Yaqin Sharqqa qo‘shimcha askarlar yuboradi

Prezident Donald Trampning Tehron bilan kelishuv ehtimoli haqidagi so‘zlariga qaramay AQSh Yaqin Sharqqa minglab qo‘shimcha askarlar yuborishi kutilmoqda. Bu haqda Reuters xabar bermoqda.

Pentagon Shimoliy Karolinadagi Fort Bragg bazasida joylashgan 82-havo-desant diviziyasidan 3-4 minggacha askarni Yaqin Sharqqa jo‘natishni rejalashtirmoqda. Qo‘shinlarning aniq qayerga va qachon yetib borishi hozircha noma’lum.

Bu harakat Eron hududida operatsiyalarni amalga oshirish variantlarini ham o‘z ichiga olishi mumkin, lekin hozircha Eron ichiga qo‘shin kiritish bo‘yicha aniq qaror qabul qilinmagan. Shunday bo‘lsa-da, bu mintaqadagi kelajakdagi potensial operatsiyalar uchun imkoniyatlarni kengaytiradi.

Oq uy matbuot kotibi o‘rinbosari Anna Kelli qo‘shinlarni joylashtirish bo‘yicha barcha e’lonlar Pentagondan chiqishini aytdi.

«O‘zimiz ta’kidlaganimizdek, prezident Tramp doimo barcha harbiy variantlarga ega», – dedi Kelli.

AQSh va Isroilning Eronga qarshi harbiy operatsiyalari 28-fevralda boshlangan bo‘lib, AQSh Eron ichidagi 9 mingta nishonga zarba bergan. Qo‘shma shtatlar jamoatchilik so‘rovlariga ko‘ra, AQShning Eronga beradigan zarbalarini qo‘llab-quvvatlash darajasi pastligicha qolmoqda.

Avvalroq Kursiv Uzbekistan Yaqin Sharqdan evakuatsiya qilingan o‘zbekistonliklar 33 mingga yaqinlashgani haqida xabar bergan edi.