Samsung kompaniyasi Galaxy A57 va Galaxy A37 smartfonlarini rasman namoyish qildi. Bu haqda GSM Arena nashri ma’lum qildi.
Yangi modellarda oldingi avlodlar ruhidagi dizayn saqlangan, ammo korpus materiali yaxshilangan, yangi platformalar va sun’iy intellekt funksiyalari qo‘shilgan. Kamera yangilanishlari esa minimal darajada amalga oshirilgan. Savdo 10-aprel kuni boshlanadi.
Galaxy A57 xususiyatlari
Galaxy A57 4-nanometrli Exynos 1680 tizimli chipga ega bo‘lib, sovutish samaradorligini oshirish uchun 13% kattalashtirilgan bug‘lash kamerasi bilan jihozlangan. Qurilma metall ramka va IP68 darajasida himoya bilan chiqarilgan.
Galaxy A37 xususiyatlari
Galaxy A37 Exynos 1480 chipi bilan ishlaydi (Galaxy A55 singari). A57 modelidan farqli ravishda, uning yon ramkasi plastmassadan ishlangan. Qurilmaning qalinligi va og‘irligi 6,9 mm va 179 grammni tashkil qiladi, A57 esa 7,4 mm va 196 gramm. Kichikroq model ham IP68 darajasida himoyaga ega.
Narxi
Samsung Galaxy A37 uch rangda — Dark Green, Gray va Light Violet — taqdim etilgan bo‘lib, 8/256 GB xotirali varianti taxminan $445 narxida sotiladi. Galaxy A57 esa Dark Blue va Gray ranglarda bo‘lib, 8/256 GB varianti taxminan $595 narxida baholangan.
Ekran va batareya
Ikkala model ham 6,7 dyuymli Super AMOLED ekran bilan jihozlangan bo‘lib, Full HD+ o‘lcham va 120 Hz yangilanish tezligiga ega. Batareya quvvati 5000 mAh bo‘lib, simli zaryadlash quvvati 45 Vt. Batareya yarim soatda 60% zaryad oladi.
Kameralar
Ikkala smartfonning asosiy kamerasi 50 MP, old kamerasi esa 12 MP. Eng katta farq super keng burchakli modulda: Galaxy A57 modeli 12 MP, A37 esa 8 MP. Uchinchi modul har ikkala modelda 5 MP bo‘lib, makro suratga olish uchun mo‘ljallangan.
Sun’iy intellekt funksiyalari va dasturiy ta’minot
Galaxy A57 bir qator sun’iy intellekt funksiyalari bilan jihozlangan: Best Face, Auto Trim (videoni avtomatik kesish), Object Eraser (obyektlarni o‘chirish) va ovozli yozuvlarni transkripsiya qilish funksiyalari mavjud. Ikkala model ham One UI 8.5 interfeysi va Android 16 bilan ishlaydi hamda keyingi 6 yil davomida yangilanish oladi.
Eslatib o‘tamiz, avvalroq Samsung Galaxy smartfonlarida qaysi ilovalar sun’iy yo‘ldosh aloqasi orqali ishlashi haqida yozgan edik.
