Yaponiyaning Mazda kompaniyasi o‘zining eng mashhur modeli – Mazda CX-5 uchun yangi yo‘ltanlamas versiyani chiqarishi mumkin. Bu haqda kompaniya vakillari ma’lum qildi.
Mazda dastur menejeri Koichiro Yamaguchi kompaniya hozircha to‘liq yo‘ltanlamas SUVga ega emasligini tan oldi. Uning so‘zlariga ko‘ra, kompaniya mijozlar talabini diqqat bilan kuzatmoqda. Agar bozorda talab yetarli bo‘lsa, CX-5 asosida yo‘ltanlamas variant ishlab chiqilishi mumkin. Bu model mavjud to‘liq yuritma tizimi tufayli bunday formatga mos keladi.
Bugungi kunda bu segmentda raqobat kuchli. Masalan, Honda CR-V TrailSport, Nissan Rogue Rock Creek va Toyota RAV4 Woodland kabi modellar mavjud. Bunday versiyalar odatda to‘liq off-road emas. Ular dizayni, balandroq klirens va qo‘shimcha himoya elementlari bilan ajralib turadi.
Mazda CX-5 kompaniya uchun muhim model hisoblanadi. 2025-yilda undan 136 mingdan ortiq dona sotilgan. Bu o‘tgan yildagiga nisbatan 1,7 foizga ko‘p.
Model 2011-yildan beri ishlab chiqariladi. Shu vaqt ichida 5 mln donadan ortiq sotilgan. CX-5 Mazda tarixidagi eng muvaffaqiyatli SUV bo‘lib qolmoqda.
Eslatib o‘tamiz, Kursiv Uzbekistan nashri 2026 Mazda3 Turbo qanday imkoniyatlarga ega ekani haqida yozgan edi.
