«UzAuto Motors» AJ tomonidan ishlab chiqarilishi boshlangan yangi Damas 3 (Chevrolet Damas Move) avtomobili aslida bir nechta davlatlarda turlicha nom bilan sotiladi. «Kursiv» Meksika bozorida Chevrolet Tornado Van 2026 ((Chevrolet Damas Move) nomi ostida sotilayotgan modelning texnik imkoniyatlarini o‘rganadi.
Model tashqi tomondan minimalistik dizaynga ega bo‘lsa-da, uning asosiy ustunligi funksionalligida. Avtomobil ichki qismi oddiy, lekin kundalik foydalanish uchun yetarli darajada qulay. Rul uch shoxli va plastik bilan qoplangan bo‘lib, sozlanmaydi. Salon esa ikki o‘rindiqli, amaliy va ortiqcha elementlarsiz ishlab chiqilgan.
Texnik imkoniyatlar
Texnik jihatdan Tornado Van 2026 1,5 litrli benzin dvigatel bilan jihozlangan. U 103 ot kuchi ishlab chiqaradi. Maksimal aylanish momenti 108 lb-ft bo‘lib, 3600 aylanishda hosil bo‘ladi. Avtomobil 6 pog‘onali mexanik uzatma bilan taqdim etiladi. Yoqilg‘i baki hajmi 45 litrni tashkil etadi, old osma esa MacPherson tizimiga asoslangan.
Modelning eng katta ustunliklaridan biri — yoqilg‘i tejamkorligi. Shahar sharoitida 15,8 km/l natija qayd etadi. Trassada bu ko‘rsatkich 12,9 km/l, aralash rejimda esa 18,1 km/l ni tashkil qiladi. Bu esa uni kundalik tashish va xizmat ko‘rsatish faoliyati uchun maqbul variantga aylantiradi.
Ishlab chiqaruvchi tomonidan 3 yil yoki 60 ming km kafolat beriladi. Bundan tashqari, kuzov uchun 5 yilgacha korroziyaga qarshi himoya kafolati mavjud.
Avtomobil faqat ikki xil rangda taklif etiladi: oq va kumushrang. Interyer dizayni barcha variantlarda bir xil bo‘lib, asosiy e’tibor funksionallikka qaratilgan.
Narx:
Meksika bozorida Tornado Van 2026 narxi 307 400 – 310 900 peso atrofida belgilangan. Bu esa taxminan $18 ming – $19 mingni tashkil etadi.
O‘zbekistondagi narxlar:
| Model | Komplektatsiya | Narx (so‘m) | Narx (dollar) |
|---|---|---|---|
| Damas Max Van | 1.2 LV0 | 134 439 000 | $11 ming |
| Damas Max Van | 1.5 LV0 | 142 471 000 | $11,6 ming |
| Damas Move Pas | 1.2 LV0 | 139 675 000 | $11,4 ming |
| Damas Move Pas | 1.2 LV1 | 144 563 000 | $11,8 ming |
| Damas Move Pas | 1.5 LV0 | 149 011 000 | $12,2 ming |
| Damas Move Pas | 1.5 LV1 | 154 128 000 | $12,6 ming |
Eslatib o‘tamiz, Kursiv Uzbekistan nashri yangi Chevrolet Damas Xitoy originali bilan solishtirilgani haqida yozgan edi.
