Chevrolet 2027-yildan boshlab Equinox modelida muhim o‘zgarish qiladi. Motor1 portalining yozishicha, kompaniya old g‘ildirakdan tortuvchi versiyalarda CVT uzatmalar qutisidan voz kechadi.
CVT o‘rniga 8 pog‘onali klassik avtomat uzatmalar qutisi o‘rnatiladi. Bu ma’lumotni kompaniya rasmiy vakili tasdiqladi. Chevrolet’ga ko‘ra, bu qaror model qatorini soddalashtirishga xizmat qiladi. Shuningdek, ishlab chiqarish jarayonidagi murakkablikni kamaytiradi.
Hozirgi 2026-yilgi Equinox’da 1,5 litrli turbo dvigatel CVT bilan ishlaydi. U 175 ot kuchi va 203 Nm moment beradi. Oddiy avtomat uzatma esa faqat to‘liq tortuvli versiyada mavjud bo‘lib, narxni oshiradi. 2027-yilgi modelda yana kichik yangilanishlar ham bo‘ladi. Masalan, yangi rang — Autumn Harvest Metallic joriy etiladi. Cacti Green esa ishlab chiqarishdan olinadi.
RS versiyasida salon dizayni ham yangilanadi. Qizil rangli elementlar yagona uslubda bo‘ladi. Shuningdek, xavfsizlik va texnologiya paketiga yangi kamera tizimi qo‘shilishi kutilmoqda. Hozirgi Equinox narxi AQSh bozorida $30,7 mingdan boshlanadi. 2027-yilgi model narxi biroz oshishi mumkin.
Eslatib o‘tamiz, Kursiv Uzbekistan nashri 2027-yilgi Chevrolet Equinox saloni dizayni yangilanishi haqida yozgan edi.
