Mercedes-Benz kompaniyasining eng hashamatli Mercedes Maybach S-Class avtomobili ham restaylingdan o‘tdi. Bu haqda Kolesa.kz nashri xabar bermoqda.
Maybach versiyasi oddiy S-Class’dan 290 mm uzunroq g‘ildirak bazasi bilan ajralib turadi. Old qismida yirik radiator panjarasi va yoritiladigan konturlar qo‘llangan. Orqa ustunlarda ham yoritiladigan logotiplar paydo bo‘lgan.
Model uchun 150 dan ortiq kuzov ranglari taklif etiladi. Shuningdek, yangi disk dizaynlari va keng moslashtirish imkoniyatlari mavjud.
Salon yanada hashamatli materiallar bilan bezatilgan. Oldin qo‘shimcha opsiya bo‘lgan ko‘plab funksiyalar endi bazaviy jihozga kiritilgan.
Orqa o‘rindiqlar alohida va to‘liq elektr sozlamalarga ega. Yo‘lovchilar uchun muzlatkich, ichimlik stakanlari va eshiklarni avtomatik yopish tizimi mavjud. Shuningdek, salonni tabiiy charm ishlatmasdan, Artico eko-charmi va Mirville matolari bilan bezash imkoniyati ham bor.
Modelning asosiy ustunligi — V12 dvigatel saqlab qolinishi. S680 versiyasida 6 litrli motor mavjud. Yevropa bozori uchun yangi V8 dvigatel taklif etiladi. Uning quvvati 612 ot kuchi va 850 Nm momentni tashkil etadi. Yengil gibrid tizim esa qo‘shimcha 23 ot kuchi beradi. Bundan tashqari, 537 ot kuchiga ega S580 va 585 ot kuchli plagin gibrid versiyalar ham mavjud.
Yangilangan Maybach S-Class uchun buyurtmalar allaqachon ochilgan. Germaniyada boshlang‘ich narx 187 606 yevrodan (taxminan $203 ming) boshlanadi.
Eslatib o‘tamiz, Kursiv Uzbekistan nashri Mercedes-Benz GLC EQ elektromobilining yangi AMG versiyasi taqdim qilinishi haqida yozgan edi.
