FIFA prezidenti Janni Infantino Eronning 2026-yilgi Jahon chempionatini boykot qilish ehtimoliga qaramay, o‘rniga boshqa jamoani jalb etish bo‘yicha hech qanday reja yo‘qligini ma’lum qildi.
Eron terma jamoasi musobaqaga bir yil avval yo‘llanma olgan bo‘lsa-da, mintaqadagi harbiy harakatlar va Oliy rahbar Oyatulloh Ali Xomanaiyning vafoti sababli ularning ishtiroki so‘roq ostida qolmoqda. FIFA rahbari futbol ziddiyatlarga qaramay birlashtiruvchi kuch bo‘lishi kerakligini ta’kidlab, Eronning ishtirokini yagona maqsad deb atadi.
«Biz real dunyoda yashayapmiz va vaziyat juda murakkabligini bilamiz, ammo Eron ushbu Jahon chempionatida eng yaxshi sharoitlarda o‘ynashini ta’minlash ustida ishlayapmiz», – dedi Janni Infantino.
Eron rasmiylari musobaqani boykot qilish ustuvor ekanligini bildirmoqda. Eron sport va yoshlar ishlari vaziri Ahmad Donyamali davlat televideniyesida qilgan chiqishida AQShdagi futbolchilar xavfsizligidan xavotirda ekanini aytdi.
«Ular so‘nggi sakkiz yoki to‘qqiz oy ichida bizga qarshi ikkita urush ochgani va minglab odamlarimizni o‘ldirgani sababli, Jahon chempionatida ishtirok etishimiz mutlaqo imkonsiz», – dedi vazir.
Shuningdek, Eron futbol federatsiyasi prezidenti Mehdi Toj ham vaziyat o‘ta murakkabligini tan oldi. Uning ta’kidlashicha, so‘nggi hujumlardan keyin turnirni umid bilan kutish deyarli imkonsiz holatga kelgan.
Avvalroq Kursiv Uzbekistan FIFA prezidenti O‘zbekiston va Ozarbayjonni U-20 JCh mezbonligi bilan tabriklagani haqida xabar bergan edi.
