Chery va Jaguar Land Rover hamkorligida yangi Freelander brendi global miqyosda taqdim etildi. Bu haqda CarNewsChina nashri xabar bermoqda.
Yangi Freelander an’anaviy hashamatli avtomobillar tajribasini zamonaviy elektromobil texnologiyalari bilan birlashtiradi. Brend 2024-yilda mustaqil yo‘nalish sifatida shakllangan va endi global bozorga chiqmoqda. Freelander boshqa Jaguar Land Rover modellari, jumladan, Range Rover yoki Defender’dan alohida ishlaydi. Shu bilan birga, u Chery’ning mavjud liniyalariga ham kirmaydi.
Brendning bosh qarorgohi Shanxayda joylashgan. Dizayn ishlari Buyuk Britaniyadagi Gaydon markazi va Shanxay jamoasi tomonidan birgalikda olib boriladi.
Birinchi model: Concept97
Freelander’ning ilk modeli Concept97 kontsept-kari bo‘ldi. U o‘rta va katta o‘lchamli 6 o‘rindiqli SUV sifatida ishlab chiqilgan. Model uzunligi 5100 mm dan oshadi. G‘ildirak bazasi esa 3000 mm dan katta. Avtomobil dizaynida klassik «qutisimon» shakl saqlangan. Shu bilan birga, zamonaviy va dinamik elementlar qo‘shilgan. Interyerda ikki ekranli tizim va ilg‘or multimedia mavjud.
Texnologiya va platforma
Freelander yangi platformaga asoslangan bo‘lib, elektr, plug-in gibrid va kengaytirilgan zaxirali versiyalarni qo‘llab-quvvatlaydi. Brend 800V yuqori kuchlanishli tizimni ham joriy etadi. Model Huawei bilan hamkorlikda ishlab chiqilgan aqlli haydash tizimi bilan jihozlanadi. Unda LiDAR sensori va ilg‘or yordamchi tizimlar mavjud.
Bundan tashqari, avtomobil Qualcomm’ning yangi avlod chipida ishlaydi. Batareya esa CATL bilan hamkorlikda ishlab chiqilgan. U 360 kVt gacha tez zaryadlashni qo‘llab-quvvatlaydi.
Eslatib o‘tamiz, Kursiv Uzbekistan nashri Freelander avtomobili qanday dizaynga ega bo‘lishi haqida yozgan edi.
