Mercedes-AMG brendining eng yuqori unumdorlikka ega avtomobillari hisoblangan Black Series modellari quvvat ko‘rsatkichlari bo‘yicha reytinggi ma’lum bo‘ldi. Bu haqda CarBuzz nashri xabar bermoqda.
Reytingning quyi pog‘onasidan 2006-yilda taqdim etilgan va ushbu seriyaga asos solgan SLK 55 AMG Black Series o‘rin oldi. Unda 400 ot kuchiga ega 5,5 litrli V8 dvigateli o‘rnatilgan bo‘lib, jami 120 dona ishlab chiqarilgan.
Undan keyingi o‘rinni 500 ot kuchiga ega CLK 63 AMG Black Series egalladi. Ushbu model Formula-1 xavfsizlik avtomobili negizida yaratilgan bo‘lib, 0 dan 100 km/soat tezlikka 4,1 soniyada erishadi.
Markaziy o‘rinlarni 510 ot kuchiga ega C63 AMG Black Series va 622 ot kuchiga ega afsonaviy SLS AMG Black Series band etdi. SLS modeli o‘zining titanli chiqarish tizimi va 3,5 soniyalik tezlanishi bilan ajralib turadi. SLS Black Series AQSh bozoriga 200 tadan kam yetkazib berilgan eng noyob model hisoblanadi.
Reyting cho‘qqisiga yaqin joyda 6,0 litrli V12 biturbo dvigatel bilan jihozlangan SL65 AMG Black Series qayd etildi. U 661 ot kuchiga ega hamda aylantirish momenti elektron tarzda 1000 Nm (738 lb-ft) bilan cheklangan.
Ro‘yxatning mutloq yetakchisi Mercedes-AMG GT Black Series bo‘ldi. 2020-yilda taqdim etilgan ushbu model 720 ot kuchini taqdim etadi va Nyurburgring trassasidagi eng tezkor seriyali avtomobillar kuchli uchligiga kiradi. Ushbu modelda ilk bor yassi tirsakli val texnologiyasi qo‘llanilgan.
Avvalroq Kursiv Uzbekistan Mercedes-Benz GLC EQ elektromobilining yangi AMG versiyasi taqdim qilinishi haqida xabar berilgan edi.
