O‘zbekistonda soliq qarzlari va muammoli kreditlarni undirishda yangi tizim joriy etiladi

O‘zbekistonda soliq qarzlari va muammoli kreditlarni undirishda yangi tizim joriy etiladi. Bu haqda prezidentning tegishli farmoni qabul qilindi.

Endilikda ijro hujjatlari asosida qarzdorlarning mol-mulki davlat ijrochisi qarori bilan elektron onlayn auksion orqali sotilishi mumkin bo‘ladi. Bu jarayonni tezlashtirish va shaffoflikni oshirishga xizmat qiladi. Yangi tartibga ko‘ra, yuridik shaxslarning mol-mulkini xatlash va ko‘zdan kechirish bilan bog‘liq hujjatlarni rasmiylashtirish vakolatlari ham qayta taqsimlanadi. Soliq qarzlari bo‘yicha bunday ishlarni soliq organi mansabdor shaxsi amalga oshiradi.

Agar majburiyat garov bilan ta’minlangan bo‘lsa, bu jarayon davlat ijrochisi topshirig‘i asosida tijorat bankining vakolatli xodimi tomonidan bajariladi. Bu esa jarayonni yanada operativ qilishga qaratilgan. Shuningdek, savdolarni tashkil etish bilan bog‘liq barcha hujjatlar elektron platformalar orqali yuboriladi. Bu ortiqcha qog‘ozbozlikni kamaytiradi va vaqtni tejaydi.

Yangi tizimda mol-mulkni realizatsiya qilish bilan bog‘liq ayrim huquqiy xatarlar ham qayta ko‘rib chiqilgan. Endilikda bu bilan bog‘liq mas’uliyat rasmiylashtiruvchi idoralar zimmasida bo‘ladi.

Eslatib o‘tamiz, Kursiv Uzbekistan nashri O‘zbekistonda budjet hisobi standarti xalqaro standartlarga muvofiqlashtirilgani haqida yozgan edi.