Jahon oltin kengashi (World Gold Council) ma’lumotlariga ko‘ra, 2026-yil fevral oyida markaziy banklar tomonidan oltin xaridi yana faollashdi. Hisobotga ko‘ra, oy davomida dunyo markaziy banklari jami 19 tonna oltin sotib olgan.
Ushbu jarayonda O‘zbekiston Markaziy banki ham faol ishtirok etib, fevral oyida 8 tonna oltin xarid qildi. Natijada mamlakat oltin zaxiralari 407 tonnaga yetdi va bu umumiy zaxiralarning qariyb 88 foizini tashkil etmoqda. Yil boshidan buyon esa O‘zbekiston jami 16 tonna oltin sotib olgan.
Mamlakat ketma-ket besh oy davomida oltin xarid qilayotgan davlatlar qatoriga kirib, zaxiralarni oshirish siyosatini izchil davom ettirmoqda.
Fevral oyida eng yirik xaridor Polsha bo‘lib, 20 tonna oltin sotib oldi. Shuningdek, Chexiya, Malayziya, Xitoy va Kambodja ham zaxiralarini oshirdi. Aksincha, Turkiya va Rossiya oltin zaxiralarini qisqartirgan.
Tahlillarga ko‘ra, global miqyosda markaziy banklar oltinni zaxira aktiv sifatida saqlashga qiziqishni davom ettirmoqda. Ayniqsa, rivojlanayotgan davlatlar oltin orqali zaxiralarni diversifikatsiya qilish va xalqaro moliyaviy bozorlardagi xatarlarni kamaytirishga intilmoqda.
Avvalroq «Kursiv» nashri O‘zbekiston oltin eksportini 5 oyga to‘xtatib, salbiy saldoni uch barobarga oshirgani haqida yozgandi.
Joriy yilning dastlabki ikki oyida umumiy eksport hajmi $3,54 milliardni tashkil etib, 2025-yilning shu davridagiga nisbatan 23,4 foizga kamaydi. Eksport tarkibida xizmatlar yetakchi o‘rin egallab, $1,44 milliardga teng bo‘ldi. Sanoat mahsulotlari $643,2 million va oziq-ovqat mahsulotlari $350,7 million bilan keyingi o‘rinlarda turadi.
