O‘zbekiston mustaqilligining 35-yilligi esdalik oltin tangasi zarb etiladi

Markaziy bank 2026-yil 1-sentabrga qadar «Mustaqillikning 35 yilligi» esdalik oltin tangasini zarb etadi. Bu haqda prezidentning tegishli qarorida qayd etildi. Tangalar mamlakat mustaqilligi va suverenitetini ramziy qiladi.

Shuningdek, Madaniyat vazirligi Toshkent shahrida bo‘lib o‘tadigan asosiy bayram tadbiriga tayyorgarlik ko‘rish va uni o‘tkazish bo‘yicha mas’ul etib belgilandi. Badiiy akademiya, Yozuvchilar uyushmasi va Ma’naviyat markazi 1-iyunga qadar «Vatan fidoyilari» ramziy monumentining eskiz loyihasini tayyorlaydi. Ushbu monument Qoraqalpog‘iston Respublikasi va barcha viloyat markazlaridagi umummilliy birdamlik bog‘larining markaziy qismiga o‘rnatiladi.

Shu bilan birga, Ma’naviyat va ma’rifat markazi Yangi O‘zbekiston taraqqiyoti tadqiqotlari instituti bilan birgalikda «Mustaqillik zafarnomasi» nomli maxsus kitob-albomni tayyorlaydi. Yoshlar ishlari agentligi va Ma’naviyat markazi aprel oyidan ijtimoiy tarmoqlarda #Mustaqillik35 va #Uzb35 xeshteglari ostida flashmoblar, viktorina va podkastlar kabi targ‘ibot aksiyalarini o‘tkazadi.

Avvalroq Kursiv Uzbekistan prezident huzurida Xalq qabulxonasi tashkil etilishi haqida yozgandi.