Tramp Hormuz bo‘g‘ozi bloklanishi sababli Eronga haqoratli tahdid qildi

AQSh prezidenti Donald Tramp Hormuz bo‘g‘ozi bloklanishi sababli Eronga haqoratli tahdid qildi. Bu haqda BBC xabar bermoqda.

Tramp o‘zining Truth Social tarmog‘idagi sahifasida keskin bayonot qoldirdi. U Eron elektr stansiyalari va ko‘priklari nishonga olinishi mumkinligini ta’kidladi. Shu bilan birga, AQSh yetakchisi muzokaralar orqali kelishuvga erishish ehtimoli ham borligini bildirgan. Eron rasmiylari bu bayonotni keskin rad etgan. Tehron vakillari Trampning so‘zlarini asabiy va asossiz deb baholab, ular bo‘g‘oz ochilishi faqat urush oqibatlari uchun kompensatsiya masalasi hal etilgandan keyin ko‘rib chiqilishini aytmoqda.

Yaqin Sharqdagi vaziyat keskinlashib bormoqda. So‘nggi haftalarda AQSh va Isroil tomonidan Eron hududiga zarbalar berildi. Eron esa bunga javoban dron va raketa hujumlarini davom ettirmoqda. Hormuz bo‘g‘ozi atrofidagi vaziyat global bozorlar uchun muhim ahamiyatga ega. Ushbu yo‘lak orqali dunyo neft va gazining qariyb beshdan bir qismi tashiladi. Tranzitdagi uzilishlar fonida jahon bozorida neft narxlari keskin oshdi.

Mintaqadagi zarbalar davom etmoqda. Isroilda Hayfa shahrida turar joy binosi raketa zarbasiga uchradi va to‘rt kishi jarohat oldi. Fors ko‘rfazi mamlakatlarida ham zarbalar qayd etilgan. BAA, Quvayt va Bahraynda energetika obyektlari zarar ko‘rgan.

Eslatib o‘tamiz, Kursiv Uzbekistan nashri Rim papasi Trampni Eron urushi masalasida tanqid qilgani haqida yozgan edi.