Xitoyda yangi Avatr 12 elektromobili rasman taqdim etildi va savdoga chiqarildi. Model 8-aprel kuni bozorga chiqdi va uning narxi 293,9 ming yuandan boshlanib, 433,9 ming yuangacha yetadi, bu taxminan $42,6 mingdan $62,9 minggacha degani.
Yangi model texnologik jihatdan sezilarli yangilanishlar bilan ajralib turadi. U Huawei’ning ilg‘or haydovchiga yordam beruvchi tizimi bilan jihozlangan bo‘lib, 896 qatorli LiDAR sensori o‘rnatilgan ilk avtomobillardan biri hisoblanadi. Mashina dizayni deyarli o‘zgarmagan, biroq tom qismidagi sensorlar va aqlli yoritish elementlari bilan yangilangan.
Avatr 12 uzunligi 5 metrga yaqin bo‘lgan yirik sedan bo‘lib, saloni zamonaviy texnologiyalar bilan jihozlangan. Ichki qismida 35,4 dyuymli 4K displey, 15,6 dyuymli markaziy ekran va raqamli oynalar mavjud. Old o‘rindiqlar isitish, ventilyatsiya va massaj funksiyalariga ega, haydovchi uchun esa «nol gravitatsiya» o‘rindig‘i taqdim etilgan.
Model ikki xil versiyada taklif etiladi. To‘liq elektr varianti 735 km gacha yurish zaxirasini ta’minlaydi va eng kuchli uch motorli versiyasi 0 dan 100 km/soatgacha atigi 2,71 soniyada tezlanadi. Gibrid versiya esa 1 260 km gacha umumiy yurish masofasini taklif etadi.
Avtomobil zamonaviy xavfsizlik va yordamchi tizimlar bilan ham jihozlangan. Unda bir nechta LiDAR sensorlari, radarlar va kameralar mavjud bo‘lib, shahar sharoitida avtomatik harakatlanish, to‘xtash va haydovchiga yordam berish imkoniyatlarini beradi.
Eslatib o‘tamiz, Kursiv Uzbekistan nashri Avatr 06T avtomobili qanday imkoniyatlar bilan taqdim etilgani haqida yozgan edi.
