Toshkentda 1-apreldan 9-aprelgacha piyozning ulgurji narxi 37 foizga pasayib, bir kilogramm uchun 2,2 ming so‘mga tushdi. Shu bilan birga, issiqxona sabzavotlari segmentida teskari dinamika kuzatilmoqda: bodringning minimal narxi ikki baravarga oshdi. Mazkur ma’lumotlar O‘zbekiston Iqtisodiyot va moliya vazirligi tomonidan e’lon qilingan bo‘lib, Kursiv Uzbekistan ularni solishtirib chiqdi.
Hisoblash metodologiyasi
Vazirlik metodologiyasiga ko‘ra, ma’lumotlar har kuni asosiy ulgurji savdo nuqtalarida yig‘iladi. Meva, sabzavot va poliz mahsulotlari (26 pozitsiya) bo‘yicha nazorat nuqtasi sifatida Food City (Yangi Qo‘yliq) majmuasi tanlangan bo‘lib, u yerda ma’lumotlar tonggi vaqtda — soat 5:00 dan 7:00 gacha to‘planadi.
Go‘sht mahsulotlari monitoringi esa «Eski Juva» (Chorsu) bozorida o‘tkaziladi. Bu yerda ma’lumotlar tungi vaqtda — soat 22:00 dan 2:00 gacha qayd etiladi. Bu go‘sht mahsulotlari shaharga kirib kelish paytidagi haqiqiy tannarxini kuzatish imkonini beradi.
Sabzavot sektori: piyoz va issiqxona mahsulotlari
Aprel oyi boshidagi asosiy ijobiy yangilik piyozning sezilarli darajada arzonlashishi bo‘ldi. Agar 1-aprel holatiga ko‘ra ulgurji narxning yuqori chegarasi kilogrammiga 3,5 ming so‘mni tashkil etgan bo‘lsa, 9-aprelga kelib u 2,2 ming so‘mga tushdi. Bu 37 foizli pasayish demakdir. Yangi hosilni yig‘ib olish kampaniyasi allaqachon boshlangan, biroq Kursiv Uzbekistan aniqlashicha, daladan chiqayotgan «yangi» piyoz hozircha qimmatroq sotilmoqda.
Shunga o‘xshash tendensiya karam segmentida ham kuzatildi: maksimal narx kg uchun 3,7 ming so‘mdan 3 ming so‘mga pasaydi. Kartoshka esa barqarorligini saqlab qolgan holda, 4–7,1 ming so‘m oralig‘ida qolmoqda.
Biroq bahorda issiqxona ekinlari uchun o‘z qoidalari bor. Eng yuqori narx o‘sishi bodringda qayd etildi: ulgurji bozorda minimal narx ikki baravarga — 6 mingdan 12 ming so‘mga sakradi. Pomidorlar ham o‘rtacha 20-30 foizga qimmatlab, maksimal ko‘rsatkich oy boshidagi 30 ming so‘mga nisbatan 36 ming so‘mga yetdi.
Go‘sht
«Eski Juva» go‘sht rastalarida deyarli o‘zgarish yo‘q. Hisobot davrida mol go‘shtining ulgurji narxi o‘zgarmadi va 75 – 110 ming so‘m oralig‘ini saqlab qoldi. Qo‘y go‘shti esa maksimal narx bo‘yicha biroz — 1,8 foizga o‘sish ko‘rsatib, 112 ming so‘mni tashkil etdi.
Dukkakli o‘simliklar va don sektori barqarorlikni namoyish etdi. «Lazer» guruchi (10 – 15 ming so‘m), mosh, no‘xat va loviya oy boshidagi narxlarda sotilmoqda.
Meva va sitrus
Ushbu toifada faqat limon sezilarli darajada qimmatladi — uning maksimal narxi 9 kun ichida 5 ming so‘mga oshib, kg uchun 42 ming so‘mga yetdi. Olma (30 ming so‘m), kivi (25 ming so‘m) va apelsin (20 ming so‘m) narxlari o‘zgarishsiz qoldi.
Avvalroq «Kursiv» O‘zbekistonda yillik inflyatsiya darajasi 7,3 foiz atrofida saqlanib qolayotgani haqida xabar bergan edi.
