So‘nggi sutka davomida o‘zbek sportida chinakam qiziqarli voqealar «qaynadi». Kimdir Yevropa yashil maydonlarida ulkan e’tirofga sazovor bo‘lsa, yana kimdir aql gimnastikasi va shaxsiy hayotda o‘ziga xos yutuqlarga erishmoqda.
Husanov — «Manchester Siti»da oy futbolchisi
Angliyaning «Manchester Siti» klubi sharafini himoya qilayotgan Abduqodir Husanov «shaharliklar»ning mart oyidagi eng yaxshi futbolchisi sovrinini qabul qilib oldi va savollariga javob qaytardi. U bo‘sh vaqtlarida FIFA video o‘yinini o‘ynab turishini va jamoasi bilan dastlabki sovrinni yutish o‘zgacha zavq berganini ta’kidladi. Shuningdek, u jamoadoshi Jeremi Doku undan tezroq yugurishini ham tan oldi.
Sindarov va Assaubayeva
Shaxmat bo‘yicha Nomzodlar turnirida rekord qayd etib, turnir jadvalida yaqqol peshqadamlik qilayotgan Javohir Sindarov shaxsiy hayotida ham yutuqlarga erishmoqda. Ushbu nufuzli musobaqaning ayollar o‘rtasidagi bahslarida ishtirok etayotgan qozog‘istonlik maftunkor shaxmatchi Bibisora Assaubayeva o‘zining Telegram kanalida o‘zbekistonlik grossmeyster bilan birga tushgan samimiy suratini joylashtirdi. Bu kutilmagan holat ijtimoiy tarmoqlarda har ikki sportchining kuzatuvchilari o‘rtasida qizg‘in muhokamalarga sabab bo‘lmoqda.
Shomurodov «Istanbul Bashakshehir» mashg‘ulotlarida
O‘zbekiston milliy terma jamoasi sardori va Turkiyaning «Istanbul Bashakshehir» klubi hujumchisi Eldor Shomurodov ayni paytda jamoasi bilan qizg‘in mashg‘ulotlar olib bormoqda. Tajribali hujumchi harakat qilayotgan klub Turkiya chempionatining 29-turi doirasida «Gencherbirligi» jamoasiga qarshi uchrashuvi o‘tkazadi. Muxlislar intiqlik bilan kutayotgan ushbu qiziqarli bahs 11-aprel kuni bo‘lib o‘tishi belgilangan.
Masharipov «Million» jamoasi mehmoni bo‘ldi
O‘zbekiston terma jamoasi futbolchilari nafaqat yashil maydonda, balki turli madaniy tadbirlarda ham faol ishtirok etib kelishmoqda. Xususan, Jaloliddin Masharipov va taniqli qiziqchi Elmurod Haqnazarov «Million» jamoasining navbatdagi konsert dasturiga tashrif buyurishdi.
