Turkiyadagi Istanbul aeroportida mahalliy va xalqaro yo‘nalishlardagi qator parvozlar ushlanib qolishi oqibatida yo‘lovchilar aeroportda qolib ketdi. Jami 192 ta reys vaqtidan kechiktirilgan va yana 2 ta parvoz butunlay bekor qilingan.
Mazkur uzilishlar asosan Turkish Airlines, Pegasus Airlines hamda Flydubai kabi yirik aviakompaniyalar faoliyatiga ta’sir ko‘rsatgan. Muammolar qamrovi nafaqat Turkiya ichki yo‘nalishlarini, balki London kabi yirik xalqaro manzillarga qilinadigan reyslarni ham o‘z ichiga oladi.
Natijada ko‘plab sayohatchilar belgilangan manzillariga vaqtida yetib bora olmagan va rejalari o‘zgargan. Ommaviy kechikishlar va bekor qilinishlarning aniq sababi yuzasidan rasmiy ma’lumot berilmagan.
Hozirgi vaqtda aviakompaniyalar tomonidan chiptalarni qaytarish yoki boshqa reyslarga almashtirish bo‘yicha ishlar olib borilayotgani taxmin qilinmoqda. Parvozlar jadvali qachon to‘liq barqarorlashishi yuzasidan hozircha aniq muddat e’lon qilinmadi.
Avvalroq Kursiv Uzbekistan Turkish Airlines’ga tegishli samolyot Samarqandda favqulodda qo‘ngani haqida xabar bergan edi.
