Toshkent shahrida 21-aprel kuni xristianlarning «Ota-onalarni xotirlash» kuni munosabati bilan aholi uchun qo‘shimcha transport qatnovlari tashkil etiladi. Bu haqda Toshkent shahar transport xizmati xabar berdi.
Unga ko‘ra, bir kunlik maxsus yo‘nalishlar quyidagicha bo‘ladi:
- K-1: Buyuk Ipak Yo‘li metrosi – Muhammad Yusuf (Dog‘iston) ko‘chasi – 3-sonli qabriston (O‘rtasaroy);
- K-2: Qo‘yliq dehqon bozori – 3-sonli qabriston (O‘rtasaroy).
Har bir yo‘nalishda 5 tadan katta sig‘imli avtobuslar (MAN, elektrobus va Yutong) harakatlanadi.
Mazkur yo‘nalishlarda yo‘l haqi 1700 so‘m etib belgilangan bo‘lib, to‘lov faqat elektron shaklda amalga oshiriladi. Avtobuslar soat 06:00 dan 20:00 gacha qatnaydi.
Bundan tashqari, qabristonlar yaqinidan o‘tuvchi mavjud yo‘nalishlarda ham qatnov nazorati kuchaytiriladi. Jumladan, 1-sonli qabriston (Botkin ko‘chasi) bo‘ylab harakatlanuvchi 1, 14, 16, 21, 30, 80 va 96-sonli avtobuslar, shuningdek 2-sonli qabriston (Do‘mbirabod) orqali qatnaydigan 17t va 98-sonli yo‘nalishlarda interval va qatnov muntazamligi qat’iy nazorat qilinadi.
Avvalroq Kursiv Uzbekistan Toshkentdan Nurafshongacha 30 daqiqalik avtobus yo‘lagi qurilishi haqida yozgandi.
