Apple qurilmalarini modernizatsiya qilishga ixtisoslashgan Caviar kompaniyasi iPhone 17 Pro va Pro Max smartfonlarining Rose Collection deb nomlangan yangi pushti rangli liniyasini taqdim etdi. Kolleksiyadagi eng qimmat modelning narxi qariyb $22 mingni tashkil qiladi.
Yangi liniya to‘rtta modeldan iborat. Ulardan eng hamyonbopi Queen of Thorns bo‘lib, uning narxi tanlangan qurilma va xotira hajmiga qarab $8 ming (424 ming rubl) dan $10 ming (559 ming rubl) gacha o‘zgaradi. Uning pushti rangga bo‘yalgan korpusining orqa panelida zargarlik emali bilan qoplangan atirgullar kompozitsiyasi tushirilgan, Apple logotipi esa tilla bilan ishlangan.
Sex and the City modeli xuddi shu nomdagi mashhur serialdan ilhomlanib yaratilgan. Orqa panelda bosh qahramon Kerri Bredshouga ishora qiluvchi poyabzallar aks etgan pushti naqsh mavjud. Ushbu model narxi $9,2 ming (499 ming rubl) dan $10,7 ming (634 ming rubl) gacha farqlanadi.
Ophelia dizayni jihatidan oldingilaridan sezilarli farq qiladi. Uning orqa paneli haqiqiy charmdan ishlangan bo‘lib, atirgul shaklidagi tilla naqsh bilan bezatilgan. Maksimal komplektatsiyadagi ushbu qurilma xaridorga $11,4 ming (734 ming rubl) ga tushadi.
Kolleksiyaning eng qimmat modeli esa Pink Lotus hisoblanadi. Xuddi Ophelia kabi, uning orqa paneli ham charmdan ishlangan, ammo naqshga 2 millimetrli 84 ta brilliant tosh o‘rnatilgan. Eng qimmatbaho versiyaning narxi $22,2 ming (1,4 mln rubl) ni tashkil etadi.
Eslatib o‘tamiz, avvalroq Kursiv Uzbekistan Apple iOS 27’da rasm tahrirlashga yangi SI funksiyalarini tayyorlayotgani haqida xabar bergan edi.
