AQShning Texas shtatiga qarashli Mineral Uells shahrida yuz bergan kuchli tornado tufayli sanoat binolari vayron bo‘ldi va kamida besh kishi kasalxonaga yotqizildi. Bu haqda AP axborot agentligi xabar bermoqda.
Dallasdan 130 km g‘arbda joylashgan shaharda shamol tezligi soatiga 193 km yetgan. Hududda qariyb 15 ming kishi istiqomat qiladi. Tarmoq uzilishlarini kuzatuvchi saytlar chorshanba kuni Texas bo‘ylab 9 mingdan ortiq, xususan, ofat hududida 230 ga yaqin obunachilar elektr ta’minotisiz qolganini ko‘rsatgan.
«Bu yerdagi vayronagarchiliklarni ko‘rib, bunga ishonish qiyin», – dedi shahar meri Regan Jonson qurbonlar yo‘qligini ta’kidlar ekan.
Ventamatic kabi yirik ishlab chiqarish korxonalari jiddiy zarar ko‘rgani sababli o‘z faoliyatini vaqtincha to‘xtatishga majbur bo‘lgan. O‘tgan haftada Janub va O‘rta G‘arb hududlarida yuz bergan qator bo‘ronlar oqibatida Texasda ikki, Michiganda esa bir kishi halok bo‘lgan.
Avvalroq Kursiv Uzbekistan Amerikaning Florida shtatiga to‘fon yopirilgani haqida xabar bergan edi.
