Casio kompaniyasi AQSh bozorida G-Shock soatlari uchun yangi Electro Green dizayn kolleksiyasini rasman taqdim qildi. Bu haqda Gizmochina nashri ma’lum qildi.
Yangi seriya beshta modeldan iborat bo‘lib, ularning barchasi yangilangan dizayn bilan ajralib turadi. Soatlarda mat qora korpus va bilaguzuk neonga yaqin yashil rangdagi elementlar mavjud. Shuningdek, qoraytirilgan LCD displey yashil yoritish tizimi bilan jihozlangan. Modellarning narxi $110 dan boshlanib, $180 gacha yetadi.
Seriyadagi eng yuqori model GA-B010BEG-1A bo‘lib, uning narxi $180 ni tashkil etadi. Ushbu model Tough Solar texnologiyasi, Bluetooth ulanishi va Casio mobil ilovasi orqali smartfon bilan sinxronlash imkoniyatiga ega. U telefonni topish funksiyasi hamda turli sozlamalarni boshqarishni qo‘llab-quvvatlaydi.
GA-B2100BEG-1A modeli $165 narxda taqdim etilgan bo‘lib, u ham shunga o‘xshash funksiyalarga ega, biroq qadam hisoblagich funksiyasiz ishlab chiqilgan. Ushbu model mashhur CasiOak korpus dizaynida tayyorlangan va bio-materiallardan foydalanilgan.
Arzonroq modellarga GD-010BEG-1, GA-100BEG-1A va GA-700BEG-1A kiradi. GD-010BEG-1 to‘liq raqamli model bo‘lib, taxminan 10 yilgacha xizmat qiluvchi batareyaga ega. GA-100BEG-1A analog-raqamli formatda ishlab chiqilgan va magnit himoya tizimi bilan jihozlangan. GA-700BEG-1A esa yirik yoritish tugmasi va 5 yilgacha xizmat qiluvchi batareyasi bilan ajralib turadi.
Barcha modellarda G-Shock seriyasiga xos zarbaga chidamlilik, 200 metrgacha suv o‘tkazmaslik xususiyati hamda taymer, sekundomer va jahon vaqti kabi asosiy funksiyalar saqlanib qolgan.
Eslatib o‘tamiz, avvalroq Huawei kompaniyasi avtomobil narxidagi olmos soatni taqdim etgan edi.
