11-mayga o‘tar kechasi Yangihayot tumani hududidan oqib o‘tuvchi Chirchiq daryosiga baliq ovlashga borgan fuqaro daryo o‘rtasidagi orolchada qolib ketgan va qutqaruvchilar yordamida olib chiqilgan. Bu haqda Favqulodda vaziyatlar vazirligi xabar berdi.
Kuchli yomg‘ir tufayli daryoda suv sathi birdan ko‘tarilib ketgan. Natijada xavfsiz hududga mustaqil qaytish baliqchi uchun xavfli bo‘lib qolgan. U darhol yordam so‘rab Toshkent shahar Favqulodda vaziyatlar bosh boshqarmasining navbatchilik qismiga murojaat qilgan.
Qutqaruvchilar zudlik bilan voqea joyiga yetib borishgan. Ular maxsus anjomlar yordamida qolib ketgan fuqaroni xavfsiz joyga olib chiqishga muvaffaq bo‘lishdi. Fuqaroning hayoti saqlab qolingan.
Avvalroq Kursiv Uzbekistan favqulodda vaziyatlar sohasida volontyorlarni rag‘batlantirish tartibi belgilangani haqida xabar bergan edi.
