15-may sanasi biznesdagi muhim qadamlar, arxitektura durdonalari va animatsiya olamidagi inqilobiy yangiliklar bilan tarixda qolgan. Kursiv Uzbekistan kunning eng muhim voqealarini xronologik tartibda taqdim etadi.
1891-yili Niderlandiyaning Eyndxoven shahrida Philips kompaniyasi tashkil etildi. Dastlab cho‘g‘lanma lampalar ishlab chiqarishga ixtisoslashgan bu korxona keyinchalik jahon miqyosidagi yirik texnologik va sog‘liqni saqlash konglomeratiga aylandi. Bugungi kunda kompaniya innovatsion tibbiyot uskunalari va maishiy elektronika mahsulotlari bilan mashhur.
1928-yilda animatsiya tarixida burilish yasagan voqea yuz berdi. Aynan shu kuni Uolt Disney yaratgan Mikki Maus ishtirokidagi ilk ovozsiz qisqa metrajli multfilm – «Plane Crazy» ekranlarga chiqdi. Garchi film avvaliga katta muvaffaqiyat qozonmagan bo‘lsa-da, u dunyoning eng taniqli va sevimli multqahramonlaridan birining tug‘ilishi sifatida ahamiyatli.
1935-yili Moskva metropoliteni o‘z ishini boshladi. O‘n uchta stansiya va 11 kilometrdan ortiq uzunlikdagi birinchi yo‘nalish muhandislik yechimlari va saroyga xos hashamatli arxitekturasi bilan ajralib turardi. Ushbu tajriba va andozalar keyinchalik mintaqadagi boshqa ko‘plab metropolitenlar, jumladan, Toshkent metrosi qurilishida ham qo‘llanilgan.
1940-yilda Kaliforniyaning San-Bernardino shahrida aka-uka Richard va Moris Makdonaldlar o‘zlarining ilk McDonald’s restoranini ochishdi. Ular xizmat ko‘rsatish tizimini optimallashtirish orqali fast-fud industriyasiga asos soldilar. Keyinchalik Rey Krokning biznesga qo‘shilishi bilan bu tarmoq dunyodagi eng yirik restoranlar tarmog‘iga aylandi.
1987-yili Shotlandiyada britaniyalik mashhur tennischi Endi Marrey tavallud topdi. U yakkalik bahslarida sobiq jahonning birinchi raqamli tennischisi, uch karra «Katta dubulg‘a» turnirlari g‘olibi hisoblanadi. Shuningdek, Marrey yakkalik bahslarida ikki marta Olimpiada oltin medalini qo‘lga kiritgan yagona tennischi sifatida tarixga kirgan.
1997-yilda fransiyalik professional futbolchi Usmon Dembele dunyoga keldi. U o‘zining ajoyib tezligi, texnikasi va har ikki oyog‘ida birdek yaxshi o‘ynay olish qobiliyati bilan ajralib turadi. Dembele faoliyati davomida «Barselona» va «Pari Sen-Jermen» kabi yirik klublarda to‘p surib, 2018-yilda Fransiya terma jamoasi bilan jahon chempioni unvoniga sazovor bo‘lgan. Shuningdek, 2025-yilda futboldagi eng nufuzli sovrinlardan biri, «Oltin to‘p»ni qo‘lga kiritgan.
Avvalroq Kursiv Uzbekistan 14-may sanasida sodir bo‘lgan muhim hodisalar haqida xabar bergan edi.
