18-may kuni O‘zbekistonning ayrim hududlarida qisqa muddatli yomg‘ir yog‘adi. Ba’zi joylarda momaqaldiroq bo‘lishi mumkin. Bu haqda Gidrometeorologiya xizmati agentligi ma’lum qildi.
Farg‘ona vodiysi viloyatlarida yog‘ingarchilik kutilmaydi. Respublika bo‘yicha shamol 7–12 m/s tezlikda esadi. Ba’zi joylarda uning tezligi 13–18 m/s gacha kuchayadi. Ayrim hududlarda shamol 20–22 m/s gacha yetishi mumkin. Shamol chang-to‘zonlar bilan kuzatilishi ehtimoli bor. Kunduzi havo harorati 30–35 daraja bo‘ladi.
Toshkent shahrida kechga yaqin qisqa muddatli yomg‘ir yog‘ishi mumkin. Poytaxtda momaqaldiroq ehtimoli ham bor. Shamol 3–8 m/s tezlikda esadi. Ayrim vaqtlarda u 10–12 m/s gacha kuchayishi, chang-to‘zonlar kuzatilishi mumkin. Toshkentda havo harorati 33–35 darajani tashkil etadi.
Tog‘ oldi va tog‘li hududlarda ba’zi joylarda qisqa muddatli yomg‘ir yog‘adi. Momaqaldiroq bo‘lishi mumkin. Ushbu hududlarda sel va suv toshqini xavfi bor. Shamol 7–12 m/s tezlikda esadi, ayrim joylarda 15–20 m/s gacha kuchayadi. Tog‘li hududlarda harorat 20–25 daraja bo‘ladi.
Eslatib o‘tamiz, Kursiv Uzbekistan nashri 17-may kuni O‘zbekistonda havo 37 darajagacha isigani haqida yozgan edi.
