Xitoyning Xpeng kompaniyasi yangi GX flagman SUV modelini Xitoy bozorida sotuvga chiqardi. CarNewsChina xabariga ko‘ra, avtomobil narxi 279,8 ming yuandan boshlanadi. Bu taxminan $41,1 mingga teng.
Yangi Xpeng GX brendning uch qatorli ilk yirik SUV modeli hisoblanadi. U BEV, ya’ni to‘liq elektr, hamda EREV, ya’ni zaryadlanuvchi gibrid kuch tizimlari bilan taklif etiladi. Model Lynk & Co 900, IM LS9 va Voyah Taishan X8 kabi yangi energiyali avtomobillar bilan raqobat qiladi.
Xpeng GX uzunligi 5 265 mm, eni 1 999 mm va balandligi 1 800 mmni tashkil etadi. G‘ildirak bazasi 3 115 mmga teng. Katta o‘lchamiga qaramay, avtomobilning aerodinamik qarshilik koeffitsiyenti 0,255 Cd deb ko‘rsatilgan. Model 21 yoki 22 dyuymli g‘ildiraklar bilan jihozlanadi. Shuningdek, unda tortib olinadigan eshik tutqichlari saqlab qolingan. Bu dizayn avtomobilning silliq va minimalistik ko‘rinishini ta’minlaydi.
Salon 2+2+2 sxemasidagi olti o‘rindiqli konfiguratsiyaga ega. Bagaj hajmi odatiy holatda 673 litrni tashkil etadi. Uchinchi qator o‘rindiqlari buklanganda bu ko‘rsatkich 1 748 litrgacha oshadi. Model elektr oyoq tayanchlari, shamollatish, isitish va 16 nuqtali massaj funksiyasi bilan jihozlangan. Avtomobilda 33 ta dinamik, ichki muzlatkich va shiftga o‘rnatilgan 21,4 dyuymli ekran mavjud.
Avtoturargoh rejimida bu ko‘rsatkich 10 darajagacha yetadi. Shu sababli uzunligi 5,2 metrdan oshadigan SUVning burilish radiusi 5,4 metrni tashkil etadi. Bu yirik oilaviy avtomobil uchun muhim texnik ustunlik hisoblanadi.
EREV versiyasida 1,5 litrli benzin dvigateli generator vazifasini bajaradi. U batareya va elektr motorlarini quvvatlaydi. Ushbu modifikatsiya ikki elektr motor bilan jihozlangan bo‘lib, umumiy quvvat 370 kW yoki 496 ot kuchiga teng.
Eslatib o‘tamiz, Kursiv Uzbekistan nashri Xpeng GX 12 soatda qariyb 25 ming buyurtma olgani haqida yozgan edi.
