2025-yilda O‘zbekiston mehnat bozori barqarorligini saqlab qoldi – kompaniyalarning 91 foizi xodimlar sonini oshirgan yoki avvalgi darajada saqlab qolgan. Bu haqda EKOPSI Consulting tadqiqotida ma’lum qilindi (tadqiqot Kursiv Uzbekistan’da mavjud).
So‘rov IT, moliya sektori va boshqa yo‘nalishlarda faoliyat yuritayotgan 63 ta o‘zbekistonlik kompaniya o‘rtasida o‘tkazildi.
Tadqiqot natijasiga ko‘ra, 2025-yilda kompaniyalarning yarmi shtatni kengaytirgan, 41 foizi xodimlar sonini o‘zgartirmagan, faqat 9 foizi qisqartirishlarni amalga oshirgan. Eng faol o‘sish professional xizmatlar, savdo, distribyusiya, IT va telekommunikatsiya sohalarida kuzatildi.
Shu bilan birga, ish beruvchilar, ayniqsa, malakali mutaxassislarni topish tobora qiyinlashayotganini qayd etgan. Eng raqobatli yo‘nalishlar sifatida IT, muhandislik va raqamli kasblar tilga olingan.
Kadrlar tanqisligi fonida kompaniyalar maoshlarni oshirishni davom ettirgan. 2025-yilda ish beruvchilarning 58 foizi oyliklarni ko‘targan bo‘lib, o‘rtacha o‘sish 13,9 foizni tashkil etgan.
2026-yilda ham biznes vakillari maoshlarni oshirish sur’atini deyarli shu darajada saqlab qolishni rejalashtirmoqda. Prognozlarga ko‘ra, o‘rtacha o‘sish 13,3 foiz atrofida bo‘ladi. Biroq endilikda maoshlarni qayta ko‘rib chiqish yanada manzilli tus olmoqda.
«2026-yilda O‘zbekiston kompaniyalari maoshlarni qayta ko‘rib chiqish sur’atini saqlab qolishni rejalashtirmoqda. O‘rtacha rejalashtirilgan o‘sish 13,3 foizni tashkil etadi. Shu bilan birga, yondashuv yanada manzilli bo‘lmoqda: mutaxassis va ekspertlar uchun maoshlarni 12,1 foizga, ishchilar uchun esa 11,6 foizga oshirish ko‘zda tutilgan», – deyiladi EKOPSI Consulting tadqiqotida.
Kompaniya vakillarining ta’kidlashicha, 2026-yilda biznes ehtiyotkorroq siyosat yuritmoqda. Aksariyat ish beruvchilar jamoalar hajmini saqlab qolishni rejalashtirayotgan bo‘lsa, asosiy e’tibor ommaviy yollashdan ko‘ra mutaxassislarni ushlab qolish va ish samaradorligini oshirishga qaratilmoqda.
Tadqiqot kompaniyalarning xodimlarni ushlab qolishning nomoddiy usullariga ham ko‘proq qiziqish bildirayotganini ko‘rsatdi. Ish beruvchilar tobora ko‘proq korporativ ta’lim, karyera dasturlari, moslashuvchan ish formati va xodimlarni qo‘llab-quvvatlashning qo‘shimcha choralarini rivojlantirmoqda.
Bundan tashqari, 2026-yilda so‘rovda qatnashgan kompaniyalarning 38 foizi barcha xodimlar maoshini indeksatsiya qilishni, 32 foizi natija va ish stajiga qarab ayrim xodimlarning maoshini oshirishni, yana 32 foizi esa alohida professional guruhlar uchun ish haqlarini ko‘paytirishni rejalashtirmoqda.
Eslatib o‘tamiz, avvalroq nogironligi bo‘lgan shaxslar uchun ish o‘rni yaratganlarga subsidiya berilishi haqida yozgan edik.
