AQSh rasmiylari Eron terma jamoasining musobaqa davomida mamlakatda qolishini xohlamaganidan so‘ng, jamoa o‘yin kunlari Meksikadan AQShga sayohat qiladi. Bu haqda Reuters xabar berdi.
Meksika prezidenti Sheynbaumning ma’lum qilishicha, FIFA Meksika hukumatiga ushbu masala yuzasidan murojaat qilgan. AQSh hukumati 11-iyundan 19-iyulgacha bo‘lib o‘tadigan turnir davomida Eron jamoasiga o‘z hududida yashashga ruxsat bermaganini ma’lum qilgan. Shu bilan birga, Eron «G» guruhidagi uchta o‘yinini AQShda o‘tkazishi belgilangan.
«Eron jamoasining Meksikada qolishi uchun ularga ruxsat bermaslikka hech qanday sabab ko‘rmayapmiz», — deya ta’kidladi prezident matbuot anjumanida.
Eron terma jamoasi 15-iyun kuni Los-Anjelesda Yangi Zelandiya bilan, 21-iyun kuni Belgiyaga qarshi yana Los-Anjelesda va 26-iyun kuni Sietlda Misrga qarshi maydonga tushadi.
Oq uy va Davlat departamenti vaziyat yuzasidan izoh berish so‘rovlariga javob qaytarmadi. AQSh prezidenti Donald Tramp mart oyida Eronning ishtirokini qo‘llab-quvvatlagan, biroq ularning shaxsiy hayoti va xavfsizligi yuzasidan Eron terma jamoasining AQShda qolishini noo‘rin deb hisoblashini aytgan edi.
Avvalroq Kursiv Uzbekistan Eron Jahon chempionatidagi bazasini AQShdan Meksikaga ko‘chirishi haqida xabar bergan edi.
