Tibbiy jihozlarni davlat ro‘yxatidan o‘tkazish jarayonida ishlab chiqarish sharoitlarini inspeksiyadan o‘tkazish tartibi tasdiqlandi. Bu haqda Adliya vazirligi ma’lum qildi.
Vazirlik tomonidan «Davlat ro‘yxatidan o‘tkazish jarayonida tibbiy jihozlarning ishlab chiqarish sharoitlarini inspeksiyadan o‘tkazish tartibi to‘g‘risida»gi idoraviy hujjat davlat ro‘yxatidan o‘tkazildi.
Yangi tartibga ko‘ra, tibbiy jihozlarning ishlab chiqarish sharoitlari ISO 13485 xalqaro standarti bilan uyg‘unlashtirilgan milliy standart talablariga muvofiqligi bo‘yicha inspeksiyadan o‘tkaziladi. Inspeksiya tibbiy jihozlarni davlat ro‘yxatidan o‘tkazish jarayonida amalga oshiriladi.
Ariza va barcha zarur hujjatlar Sog‘liqni saqlash vazirligining Farmatsevtika mahsulotlari xavfsizligi markazi davlat muassasasiga elektron axborot tizimi orqali topshiriladi. Jarayon hujjatlarni tahlil qilish hamda ishlab chiqarish obyektlarini joyiga chiqib o‘rganish bosqichlaridan iborat bo‘ladi.
Joyiga chiqqan holdagi inspeksiya davomida sifat boshqaruvi tizimi, mahsulotni kuzatish tizimi va ishlab chiqarish muhiti milliy standartlarga mosligi tekshiriladi. Aniqlangan kamchiliklarni bartaraf etish uchun ariza beruvchiga ma’lum muddat beriladi.
Shuningdek, ariza beruvchilar inspeksiya bosqichlari, holati va natijalarini axborot tizimi orqali kuzatib borishi mumkin bo‘ladi. Inspeksiya natijalari esa jamoatchilik uchun ochiq e’lon qilinib, Sog‘liqni saqlash vazirligining «Farmatsevtika mahsulotlari xavfsizligi markazi» davlat muassasasining rasmiy saytida joylashtirib boriladi.
Eslatib o‘tamiz, avvalroq tibbiy jihozlarni davlat ro‘yxatidan o‘tkazish narxlari qayta ko‘rib chiqilishi mumkinligi haqida yozgan edik.
