Germaniyaning Audi kompaniyasi va SAIC hamkorligida ishlab chiqilgan Audi E7X elektromobili Xitoy bozorida sotuvga chiqdi. Bu haqda CarNewsChina nashri xabar bermoqda.
Audi E7X brendning Xitoy bozori uchun ishlab chiqilgan yangi modelidir. Audi nomi saqlangan bo‘lsa-da, avtomobil klassik to‘rt halqali Audi logotipi o‘rniga to‘rt harfli Audi belgisi bilan chiqarilmoqda. Brend asosan yosh xaridorlarga mo‘ljallangan.
Yangi elektromobil katta besh o‘rinli krossover sifatida taqdim etildi. Uning dizaynida qiya tom chizig‘i, keng orqa qanotlar va qisqa kuzov chiqimlari ko‘zga tashlanadi. Old qismida 1446 ta LED elementdan iborat yorug‘lik chizig‘i mavjud.
E7X raqamli proyeksion faralar bilan ham jihozlangan. Ushbu tizim yo‘lga ayrim ogohlantirish va yordamchi belgilarni tushira oladi. Jumladan, masofa haqida ogohlantirish va avtomatik parkovka bo‘yicha vizual ko‘rsatmalar berilishi mumkin.
Dizayn va o‘lchamlar
Avtomobil uzunligi 5049 mm, kengligi 1997 mm va balandligi 1710 mmni tashkil etadi. G‘ildirak bazasi 3060 mmga teng. Taqqoslash uchun, E7X Audi Q8’dan 63 mm uzunroq, 2 mm kengroq va 5 mm balandroq.
Model 22 dyuymli g‘ildiraklar va Brembo tormozlari bilan jihozlangan. U uchinchi qator o‘rindiqlarsiz, faqat besh o‘rinli shaklda taklif qilinadi. Yukxona hajmi 682 litrni tashkil qiladi.
Salon texnologik uslubda ishlangan. Old panelda 27 dyuymli katta ekran va 12,3 dyuymli raqamli asboblar paneli mavjud. Ayrim versiyalarda yon oynalar o‘rniga kameralar o‘rnatilishi mumkin. Bunday holatda haydovchi va old yo‘lovchi oldida yana ikkita ekran bo‘ladi.
Old o‘rindiqlar isitish, shamollatish va massaj funksiyalariga ega. Old yo‘lovchi uchun oyoq tayanchi ham bor. Orqa o‘rindiqlarda elektr sozlash, tomga o‘rnatilgan 21,4 dyuymli ekran va ichki muzlatkich taklif etiladi.
Texnik xususiyatlar
Audi E7X to‘rt o‘rinli versiyada ham mavjud. Bu talqinda orqa qismda katta markaziy tunnel, ikkita simsiz quvvatlash maydoni va 8 dyuymli sensorli ekran joylashtirilgan. Avtomobilda 26 ta dinamikka ega Bose audio tizimi bor.
Haydovchiga yordam tizimlari uchun Momenta R7 modeli qo‘llaniladi. Avtomobil 11 ta kamera, 12 ta ultratovush radari, 3 ta millimetrli radar, LiDAR sensori va joylashuv moduliga ega. Ma’lumotlar Nvidia Orin X chipiga uzatiladi.
Elektromobil faol pnevmatik osma va orqa g‘ildiraklarni burish tizimi bilan jihozlanishi mumkin. Pnevmatik osma balandlikni 80 mm oralig‘ida o‘zgartiradi. Orqa g‘ildiraklar 7 darajagacha buriladi. Burilish radiusi 5,14 metrni tashkil etadi.
Ikki elektromotorli kuchli versiya esa 500 kW yoki 670 hp quvvat beradi. U 100 kWh batareya bilan jihozlangan. Avtomobil 0 dan 100 km/soat tezlikka 3,9 soniyada chiqadi va bir quvvatlanishda 635 kmgacha yuradi.
To‘liq tortuvli uzoq masofali versiyada 109 kWh batareya o‘rnatilgan. Bu talqinda yurish masofasi 660 kmni tashkil etadi.
Avvalroq «Kursiv» Audi E7X elektromobili qachondan sotuvga chiqishi haqida yozgan edi.
