GAC Group va Huawei hamkorligida tashkil etilgan Aistaland brendi ilk modeli GT7 uchun oldindan buyurtmalarni qabul qilishni boshladi. Bu haqda CarNewsChina nashri xabar bermoqda.
Kompaniya ma’lumotiga ko‘ra, model dastlabki besh soat ichida 10 mingdan ortiq buyurtma to‘pladi. Bu GT7’ga Xitoy elektromobil bozorida qiziqish yuqori ekanini ko‘rsatadi.
Aistaland GT7 o‘rta va yirik sinfga mansub to‘liq elektr shooting brake kuzovidagi avtomobil hisoblanadi. Model GAC’ning avtomobil ishlab chiqarish tajribasi va Huawei’ning intellektual texnologiyalarini birlashtiradi.
GT7 to‘rtta komplektatsiyada taklif etiladi. Uning oldindan buyurtma narxi 219 900 yuandan 309 900 yuangacha belgilangan. Bu taxminan $32,3 mingdan $45,6 minggacha bo‘lgan oraliqqa teng.
Texnik imkoniyatlar
Avtomobilning rasmiy sotuvlari 2026-yil iyun oyida boshlanishi rejalashtirilgan. Aistaland GT7 800 voltli yuqori kuchlanishli arxitektura asosida ishlab chiqilgan. Shassi yopiq konturli ikki kamerali pnevmatik osma va doimiy sozlanadigan amortizatorlar bilan jihozlangan.
Eng yuqori Ultra versiyasi uch motorli to‘liq uzatmali tizimga ega. Ushbu talqinning umumiy quvvati 768 hp ni tashkil qiladi. Avtomobil 0 dan 100 km/soat tezlikka 2,98 soniyada chiqadi.
Boshlang‘ich versiya bitta elektr motor va orqa uzatma bilan jihozlangan. Uning quvvati 253 kW yoki 340 hp ga teng. Bu talqin 0 dan 100 km/soat tezlikka 5,9 soniyada yetadi. GT7 uchun CATL tomonidan moslashtirilgan ikki xil batareya taklif qilinadi. Ulardan biri 86,111 kW·soat sig‘imga ega. Ikkinchisi esa 102,768 kW·soat sig‘imli Qilin batareyasidir.
Katta batareya 6C tez quvvatlashni qo‘llab-quvvatlaydi. Avtomobilning maksimal yurish zaxirasi CLTC sikli bo‘yicha 900 km gacha yetadi.
GT7 uzunligi 5 050 mm, kengligi 1 980 mm va balandligi 1 470 mm ni tashkil etadi. G‘ildirak bazasi 3 000 mm ga teng.
Yukxona hajmi 647 litrni tashkil etadi. Orqa o‘rindiqlar buklanganda bu ko‘rsatkich 1 606 litrgacha oshadi. Bundan tashqari, avtomobilda 215 litrli suv o‘tkazmaydigan old yukxona ham bor.
GT7 Huawei Qiankun ADS 5.0 intellektual haydash tizimiga ega ilk avtomobil bo‘ldi. Model apparat darajasida L3 avtonom haydashga tayyor ekani aytilmoqda.
Eslatib o‘tamiz, Kursiv Uzbekistan nashri Huawei Xitoy smartfon bozorida Apple’dan o‘zib ketgani haqida yozgan edi.
