Samsung Galaxy M36 smartfoni uchun One UI 8.5 yangilanishini tarqata boshladi. Yangilanish hozircha Janubiy Koreyada mavjud, deya xabar berdi Sammobile.
Nashr ma’lumotiga ko‘ra, ushbu model mamlakatda Galaxy Jump 4 nomi bilan sotiladi. One UI 8.5 Android 16 operatsion tizimiga asoslangan. Galaxy M36 uchun yangilanish M366KKSU5CZE3 firmware versiyasi bilan tarqatilmoqda.
Yangilanish hajmi qariyb 3 GBni tashkil qiladi. U may 2026 xavfsizlik paketini ham o‘z ichiga oladi. Bu paket smartfon xavfsizligini yaxshilashga qaratilgan. Shuningdek, One UI 8.5 telefon uchun yangi va takomillashtirilgan funksiyalarni olib keladi.
Samsung yaqin kunlarda yangilanishni boshqa mamlakatlar va bozorlar uchun ham chiqarishi kutilmoqda. Janubiy Koreyadagi Galaxy M36 yoki Galaxy Jump 4 egalari yangilanishni sozlamalar orqali tekshirishi mumkin. Buning uchun Software update bo‘limiga kirib, Download and install tugmasini bosish kerak.
Galaxy M36 dastlab Android 15 asosidagi One UI 7.0 bilan taqdim etilgan edi. Smartfon 2025-yil sentabrda Android 16 asosidagi One UI 8.0 yangilanishini olgan.
Avvalroq «Kursiv» Samsung, Oppo, Vivo, Xiaomi, Honor va Huawei smartfonlari o‘rtasida fayl almashishni osonlashtiradigan ilova chiqqani haqida yozgan edi.
