O‘zbekistonda ko‘chmas mulkni texnik inventarizatsiyadan o‘tkazish (o‘lchash) tartibi soddalashtiriladi. Bu haqda Adliya vazirligi ma’lum qildi.
Yangi tartibga ko‘ra, texnik inventarizatsiya ko‘chmas mulkning maydoni, tarkibi va texnik tavsiflarini aniqlash uchun o‘tkaziladi. Shuningdek, jarayonda obyektning amaldagi holati o‘rganiladi. Natijada ko‘chmas mulk bo‘yicha kadastr yig‘majildi shakllantiriladi.
Texnik inventarizatsiyani Davlat kadastrlari palatasi muhandislari o‘tkazadi. Bu ishni malaka shahodatnomasiga ega kadastr muhandislari ham amalga oshirishi mumkin. Inventarizatsiya birlamchi va qayta inventarizatsiya shaklida o‘tkaziladi. Jarayon bir necha bosqichdan iborat bo‘ladi.
Avval dastlabki kameral ishlar bajariladi. Keyin dala ishlari o‘tkaziladi. Yakunda dala ishlaridan keyingi kameral ishlar amalga oshiriladi. Dala ishlari davomida mutaxassislar ko‘chmas mulk joylashgan manzilga chiqadi. Ular obyektning o‘lchamlarini oladi.
Shuningdek, binoning konstruktiv elementlari va muhandislik-kommunikatsiya tarmoqlari o‘rganiladi. Texnik inventarizatsiya natijasida ko‘chmas mulkning umumiy maydoni aniqlanadi. Foydali maydon, hajm va boshqa texnik ko‘rsatkichlar ham qayd etiladi.
Ko‘chmas mulk rejalari elektron shaklda tayyorlanadi. Ular 1:50, 1:100, 1:150 yoki 1:200 masshtablarda rasmiylashtiriladi. Inventarizatsiya natijalaridan norozi bo‘lgan shaxslar Kadastr agentligiga murojaat qilishi mumkin. Shuningdek, ular sudga murojaat etish huquqiga ham ega.
Eslatib o‘tamiz, Kursiv Uzbekistan nashri yerlarni ijaraga berish muddati 49 yil etib belgilangani haqida yozgan edi.
