Rollme kompaniyasi iPhone 17 Pro Max uchun VisionCase nomli noodatiy aksessuarni taqdim etdi. Ushbu qurilma oddiy himoya g‘ilofi funksiyasini bajarish bilan birga, o‘rnatilgan kichik ekran orqali qo‘shimcha imkoniyatlarni ham taqdim qiladi.
VisionCase 1,85 dyuymli, 360 × 360 piksel aniqlikdagi displey bilan jihozlangan bo‘lib, unda kiruvchi qo‘ng‘iroqlar, xabarlar va bildirishnomalar haqidagi ma’lumotlarni ko‘rish mumkin. Shuningdek, ekran orqali turli bildirishnoma va tizim axborotlarini ham aks ettirish imkoniyati mavjud.
Aksessuar qo‘shimcha funksiyalarni ham qo‘llab-quvvatlaydi. Jumladan, foydalanuvchilar bir tugma orqali ovoz yozishni yoqishi, turli effektlarga ega yuguruvchi matnlarni sozlashi hamda asosiy kamera orqali tasvirni oldindan ko‘rish funksiyasidan foydalanishi mumkin.
Bundan tashqari, VisionCase ichiga retro uslubdagi mini-o‘yinlar, fonar funksiyasi, raqamli vizit kartalarni qo‘llab-quvvatlash va doimiy faol ekran rejimi kabi imkoniyatlar ham kiritilgan.
Qurilma 400 mA·soat sig‘imli akkumulyator bilan ta’minlangan bo‘lib, ishlab chiqaruvchi ma’lumotiga ko‘ra, bir zaryad bilan bir haftagacha ishlashi mumkin. Shuningdek, u teskari zaryadlash funksiyasini ham qo‘llab-quvvatlaydi, ya’ni kabel orqali ulangan smartfondan quvvat olishi mumkin.
VisionCase aksessuarining narxi $50 etib belgilangan.
Eslatib o‘tamiz, avvalroq iPhone 18 Pro to‘q olcha rangda chiqishi mumkinligi haqida yozgan edik.
