O‘zbekiston prezidenti Shavkat Mirziyoyev Filippin prezidenti Ferdinand Markosga ta’ziya yo‘lladi. Bu haqda prezident matbuot xizmati xabar bermoqda.
Ta’ziya Mindanao orolining janubiy sohillarida yuz bergan kuchli zilzila oqibatlari munosabati bilan yo‘llangan. Tabiiy ofat natijasida ko‘plab odamlar halok bo‘lgan va jarohatlangan. Davlat rahbari qurbonlarning oila a’zolari va yaqinlariga chuqur hamdardlik bildirdi. Shuningdek, jabrlanganlar tez orada sog‘ayib ketishini tiladi.
Zilzila haqida
Filippinning Mindanao oroli janubida kuchli zilzila yuz berdi. Yer silkinishi epitsentri General Santos shahridan taxminan 58 kilometr uzoqlikda joylashgan. Zilzila o‘chog‘i 57 kilometr chuqurlikda qayd etilgan.
Kuchli yer silkinishidan so‘ng mintaqada sunami xavfi e’lon qilindi. Shu sababli qirg‘oqbo‘yi hududlarida yashovchi aholiga ehtiyot choralarini ko‘rish tavsiya etildi. General Santos xalqaro aeroporti faoliyati ham vaqtincha to‘xtatildi.
So‘nggi ma’lumotlarga ko‘ra, tabiiy ofat oqibatida kamida bir necha kishi halok bo‘lgan. Yana to‘rt kishi jarohat olgan. Zilzila natijasida General Santos shahridagi ayrim binolarga zarar yetgan. Ba’zi joylarda qisman qulash holatlari ham qayd etilgan.
Hozirda qutqaruv xizmatlari voqea joylarida ish olib bormoqda. Mutaxassislar zarar ko‘rgan hududlarni o‘rganmoqda va aholiga yordam ko‘rsatmoqda.
Eslatib o‘tamiz, Kursiv Uzbekistan nashri Filippindagi kuchli zilzila oqibatida bir kishi halok bo‘lgani haqida yozgan edi.
