General Motors Chevrolet Equinox 2027 elektromobilining buyurtma yo‘riqnomasidan tezkor uy sharoitida quvvatlash imkonini beruvchi muhim opsiyani olib tashladi. Bu haqda GMAutority nashri xabar bermoqda.
Avvalgi model yilida ushbu uskuna Equinox EV RS talqinida qo‘shimcha paket sifatida taklif etilgan. 2026-yilgi Chevrolet Equinox EV RS xaridorlari RPO ZL5 paketi orqali 19,2 kVt quvvatlash modulini tanlashi mumkin edi.
Ushbu paket 1 295 dollar turar, faqat eng yuqori RS komplektatsiyasida mavjud bo‘lgan. Paket tarkibiga nafaqat yuqori quvvatli Level 2 quvvatlash imkoniyati, balki 3 kVt quvvatga ega ikki tomonlama energiya uzatish funksiyasi ham kirgan.
2027-yildan boshlab esa bu imkoniyat bekor qilinadi. Natijada, Chevrolet Equinox EV’ning barcha versiyalari Level 2 AC quvvatlash stansiyasiga ulanganda standart 11,5 kVt bort quvvatlagichdan foydalanadi. Bu ko‘rsatkich ko‘pchilik foydalanuvchilar uchun tungi quvvatlash jarayonida yetarli bo‘lsa-da, avvalgi 19,2 kVt tizim uy yoki tijorat quvvatlash stansiyasi mos bo‘lgan holatlarda sezilarli darajada tezroq quvvat olish imkonini bergan.
ZL5 paketining bekor qilinishi bilan Equinox EV’da ikki tomonlama quvvat uzatish imkoniyati ham yo‘qoladi. Bu texnologiya avtomobildagi energiyani tashqi qurilmalar yoki ayrim holatlarda uy energiya tizimlariga uzatish imkonini beradi.
Kompaniya nimani ko‘zlamoqda
GM so‘nggi yillarda bunday yechimlarni ayrim elektromobillarida kengaytirib kelayotgan edi, biroq Equinox EV uchun mazkur opsiya 2027-yildan boshlab mavjud bo‘lmaydi.
Chevrolet Equinox EV hozirda General Motors’ning Shimoliy Amerikadagi eng arzon BEV3 platformasiga asoslangan elektromobillaridan biri hisoblanadi. Model kompaniyaning elektr krossoverlar qatorida muhim o‘rin tutadi va ommaviy xaridorlarga mo‘ljallangan EV strategiyasida asosiy modellar safidan joy olgan.
Mutaxassislar fikricha, GM bu qaror orqali ishlab chiqarish jarayonini soddalashtirishi va texnik konfiguratsiyalar sonini kamaytirishi mumkin. Biroq kompaniya hozircha 19,2 kVt quvvatlash modulining nega olib tashlanganiga rasman izoh bermagan.
Oddiy foydalanuvchilar uchun bu o‘zgarish katta muammo tug‘dirmasligi mumkin. Chunki 11,5 kVt quvvatlagich elektromobil akkumulyatorini tun davomida sezilarli darajada to‘ldirishga yetadi. Ammo uy sharoitida imkon qadar tezroq Level 2 quvvatlashni xohlagan mijozlar 2027-yilgi modelda bunday imkoniyatdan foydalana olmaydi.
Eslatib o‘tamiz, Kursiv Uzbekistan nashri yangi Damas 3 avtomobilini qanday xarid qilish mumkinligi haqida yozgan edi.
