Jahon chempionatining guruh bosqichida «nemis mashinasi» o‘zining butun kuchini ishga soldi va Kyurasao terma jamoasi ustidan 7:1 hisobida ishonchli g‘alabani qo‘lga kiritdi.
Uchrashuv kutilganidek yevropaliklarning tezkor hujumlari bilan boshlandi. O‘yinning 6-daqiqasidayoq Florian Virtsning ajoyib uzatmasidan so‘ng Feliks Nmecha hisobni ochib, nemislarni xotirjamlikka chorlagandek bo‘ldi.
Biroq Kyurasao taslim bo‘lishni xohlamadi. 21-daqiqada kutilmagan qarshi hujum yuzaga keldi va Livano Komenensia Germaniya himoyachilarini xato qilishga majbur etib, muvozanatni tikladi – 1:1.
Germaniya terma jamoasi birinchi bo‘lim yakunigacha bosimga asoslangan o‘yinini namoyish etdi. 38-daqiqada Braun yetkazib bergan to‘pni Niko Shlotterbek darvozaga joylab, jamoasini yana oldinga olib chiqdi.
Kyurasao futbolchilarining ruhiyatiga eng katta zarba esa bo‘limga qo‘shib berilgan vaqtda berildi. Belgilangan penaltini Kay Xaverts o‘ta sovuqqonlik bilan aniq amalga oshirib, hisobdagi farqni ishonchli ko‘rinishga keltirdi – 3:1.
Ikkinchi bo‘lim boshlanishi bilan intrigaga butunlay nuqta qo‘yildi. 47-daqiqada tajribali Joshua Kimmixning uzatmasidan so‘ng, Germaniyaning yosh iqtidori Jamol Musiala nemslarning to‘rtinchi golini kiritdi. 68-daqiqada Nataniel Braun hisobni yanada yiriklashtirdi.
O‘yin yakuniga yaqin, aniqrog‘i 78 va 88-daqiqdalarda Undav va Xaverts o‘z hisobiga gol yozib qo‘ydi. Yakuniy hisob – 7:1.
Endi ushbu ishonchli g‘alabadan so‘ng Germaniya guruhning 2-turida Kot-d’Ivuar bilan haqiqiy jang o‘tkazadi. Kyurasao terma jamoasini esa navbatdagi turda Janubiy Amerikaning vakili Ekvadorga qarshi o‘ta og‘ir sinov kutib turibdi.
Avvalroq Kursiv nashri Turkiya JChni mag‘lubiyat bilan boshlagani haqida xabar bergan edi.
