JCH – 2026 guruh bosqichida Eron va Yangi Zelandiya terma jamoalari o‘rtasidagi uchrashuv 2:2 hisobida yakunlandi. «G» guruh doirasidagi bahs AQShning Los-Anjeles shahri yaqinidagi Inglvudda joylashgan SoFi stadionida bo‘lib o‘tdi.
Uchrashuv Yangi Zelandiya uchun juda muvaffaqiyatli boshlandi. O‘yinning 7-daqiqasida Elayja Jast hisobni ochdi. Hujum davomida Kris Vud to‘pni yaxshi ushlab turib, sherigiga qulay vaziyat yaratdi. Jast esa zarbani aniq amalga oshirib, Yangi Zelandiyani oldinga olib chiqdi.
Shundan so‘ng Eron hisobni tenglashtirish uchun bosimni kuchaytirdi. Mehdi Taremi jarima maydoni tashqarisidan xavfli zarba yo‘llab, darvoza ustunini nishonga oldi. Birinchi bo‘lim davomida Yangi Zelandiya darvozaboni Maks Krokomb ham bir necha bor xatoga yo‘l qo‘ydi, biroq eronlik futbolchilar bu vaziyatlardan unumli foydalana olmadi.
Eronning javob goli 33-daqiqada urildi. Ramin Rezoiyon o‘ng qanotdan boshlangan hujumda faol harakat qildi va jarima maydoni ichida paydo bo‘lgan qulay vaziyatdan foydalanib, to‘pni darvozaga yo‘lladi. Dastlab gol ofsayd ehtimoli sababli tekshirildi, biroq VAR ko‘rigidan so‘ng hakam markazni ko‘rsatdi va hisob 1:1 bo‘ldi.
Birinchi bo‘lim oxirida Eron yana bir bor raqib darvozasini ishg‘ol qilgandek bo‘ldi. Ali Ne’matining bosh bilan bergan zarbasidan so‘ng to‘p darvozadan joy oldi, ammo yordamchi hakam ofsayd qayd etdi. Takroriy lavhalar bu qaror to‘g‘ri bo‘lganini ko‘rsatdi.
Ikkinchi bo‘lim boshida Eron tarkibida o‘zgarish amalga oshirildi. Dubayning «An-Nasr» klubida to‘p suradigan Mehdi Goyedi Arya Yusufiy o‘rniga maydonga tushdi. Uchrashuvning ikkinchi qismi 1:1 hisobida davom ettirilmoqda.
O‘yinda Yangi Zelandiya jismoniy kurash va tezkor hujumlarga tayansa, Eron ko‘proq qanotlardan bosim qilishga urinmoqda. Kris Vud birinchi bo‘limda hujumlarni bog‘lashda faol bo‘ldi, Eron safida esa Ramin Rezoiyon va Mehdi Taremi eng xavfli futbolchilar sifatida ajralib turdi.
Yangi Zelandiya 56-daqiqada yana oldinga chiqib oldi. Jamoaning ikkinchi goli chiroyli kombinatsion hujum natijasida yuzaga keldi. Hujum chap qanotdan, «Reksem» himoyachisi Liberato Kakache ishtirokida boshlandi. Shundan so‘ng Elayja Jast to‘p bilan oldinga harakat qildi, jamoadoshi bilan devor uslubida pas almashdi va jarima maydoni tomon yorib kirdi.
Jast tashqi oyoq tomoni bilan Kris Vudga aqlli uzatma berdi. Yangi Zelandiya hujumchisi esa to‘pni bir tegishda yana uning yo‘liga qaytardi. Natijada Jast qulay vaziyatga chiqib bordi.
U to‘p atrofidan tez aylanib o‘tdi va sirpanib kelgan himoyachi hamda Eron darvozaboni Alirizo Beyronvand ustidan yuqorilab boruvchi aniq zarba yo‘lladi. Shu tariqa Elayja Jast o‘zining ushbu uchrashuvdagi ikkinchi golini urdi va Yangi Zelandiyani 2:1 hisobida oldinga olib chiqdi.
Bahsning 64-daqiqasida Muhammad Mohebiy gol urib, Eronni o‘yinga qaytardi – 2:2. Eronning ikkinchi goli juda chiroyli kombinatsiya natijasida yuzaga keldi. Maydonning chap tomonidan o‘ng qanotga aniq va uzoq uzatma berildi. To‘p Ramin Rezoiyonning yo‘liga juda qulay tarzda yetib bordi. U avval to‘pni nazorat qildi, keyin zarba yoki uzatma uchun o‘ziga qulay holat yaratdi va uchinchi teginishda jarima maydoni ichiga aniq kross yo‘lladi.
Muhammad Mohebiy bu vaziyatda raqib himoyachisi Maykl Boksoll nazoratidan chiqib ketdi va to‘pni bosh bilan darvozaga yo‘lladi. Uning zarbasi chap ustunga tegib, darvoza ichiga kirib ketdi. Yangi Zelandiya darvozaboni Maks Krokomb bu zarbani qaytarishga ojizlik qildi.
Eslatib o‘tamiz, Kursiv Uzbekistan nashri Ispaniya Kabo-Verde darvozasiga yo‘l topa olmagani haqida yozgan edi.
